Legjenda italiane e futbollit, Fabio Cannavaro ishte i ftuar special i Federatës Shqiptare të Futbollit pasi ndau eksperiencën e tij me disa kursantë, përsa i përket licencës UEFA PRO.
Prezenca e fituesit të “Topit të Artë 2006”, kishte si qëllim rritjen e nivelit të trajnerëve të rinj në vendin tonë. Cannavaro nuk kurseu elozhet si për Kombëtaren shqiptare apo FSHF-në.
Është vetë presidenti i FSHF-së, Armand Duka që e ka vlerësuar maksimalisht Cannavaron , duke treguar që ishte kënaqësi të kishin një mysafir të tillë në “Shtëpinë e Futbollit”.
Me anë të një postimi në faqen zyrtare, presidenti Duka ka treguar detaje të vogla mbi vizitën e Cannavaros në zyrat e Federatës Shqiptare të Futbollit.
“Fabio Cannavaro, një emër i madh i futbollit italian dhe atij botëror, ishte mysafiri ynë në "Shtëpinë e Futbollit" dhe ndau eksperiencën e tij me kursantët e licencës "UEFA Pro", me qëllim rritjen e trajnerëve tanë, që është një objektiv i rëndësishëm i Federatës.
Kënaqësi edhe të dëgjoja vlerësimin e tij për rritjen e FSHF-së dhe Kombëtares sonë, një motivim për të gjithë komunitetin tonë për të vijuar punën për zhvillimin e futbollit në tërësi”, shkruan Armand Duka.
Lexo gjithashtu
