Emiliano Vila, Renato Malota dhe Gëzim Krasniqi ishin tre lojtarët e larguar nga klubi i Partizanit në këtë merkato dimri. Krejt papritur futbollistët e kuq mësuan se nuk ishin më në planet e drejtuesve për të vijuar sezonin.
Por natyrshëm lind pyetja: Pse nuk i zyrtarizon klubi i kuq në kanalin zyrtar largimet e këtyre futbollistëve? Po të analizojmë secilin do të konkludojmë që kontributi i tyre është i padiskutueshëm. Mjaftojmë të përmendim golin e Vilës të shënuar në Korçë para dy sezonesh që pati vlerën e 3 pikëve, por gjithashtu çoi Partizanin fare pranë titullit.
Renato Malota shënoi një gol mjaft të rëndësishëm, pikërisht në një ndeshje që të kuqtë janë të dënuar për ta fituar, derbin kundër Tiranës. Afrimi i lezhjanit në merkaton e verës së kaluar pati shumë bujë dhe jo më kot... Shtatlarti është ndër më të mirët në rolin e tij në prapavijë. E njëjta gjë mund të thuhet edhe për Krasniqin, që për vite me radhë ka kontribuar për 15-herë kampionët e Shqipërisë.
Me shkak apo shkak, drejtuesit "i flakën në rrugë", e tani as vetë ata nuk dinë pse nuk janë më pjesë e Partizanit. Si në çdo largim, klubi i kuq ishte ai që zyrtarizonte largimet e lojtarëve. Mjafton të kujtojmë fundin e dhjetorit ku pati një sërë largimesh futbollistësh të huaj, madje në kanalin zyrtar ata falënderoheshin për 'kontributin' e dhënë. Mos ndoshta është më e rëndësishme që të kontribuosh në stol se sa në fushë?! /Newsport.al/
Lexo gjithashtu
