Kombëtarja shqiptare do të luajë nesër përballë Ishujve Faroe, ndeshjen e parafundit të grupeve në kualifikueset e Euro 2024. Bileta është prerë për Gjermani por kuqezinjtë luajnë për të siguruar vendin e parë në grup teksa i duhet vetëm 1 pikë.
Trajneri Sylvinho paralajmëroi rotacione në këtë sfidë dhe stoli i garanton atij një ekip të denjë për të performuar në nivel të lartë. Nga porta në mbrojtje, mesfushë e sulm, pankina ofron alternativa cilësore.
Nëse braziliani vendos të bëjë rotacion total, atëherë formacioni do të nisë me Strakoshën në portë, Balliu, Mersinaj, Gjasula i spostuar prapa dhe Veseli në të majtë. Mesfusha me Baren i cili doli në konferencë dhe Qazim Laçin, ndërsa para tyre, Ernest Muçi në vendin e Bajramit. Nga krahët Muja dhe Uzuni në mbështetje të Dakut.
