Egnatia ka fituar 2-1 me Kastriotin për javën e katërt të Superligës. Ndeshja është vendosur në të 92 minutë, teksa ka qenë Pedro heroi I vendasve me një dopietë. Gjithçka ka ndodhur pas një krosimi nga këndi në shtesë, me brazilianin që gjen golin e tretë personal në katër javë për djemtë e Maganit.
Sfida ka nisur më mirë për Egnatia që kontrolloi lojën, ndërsa do shënonte nga pika e bardhë me Pedron (24'). Pjesa e dytë do niste keq për Kastriotin, që e panë veten me 10 lojtarë pas dy kartonave të verdhë të Kodrës, që u fut në fushë në pjesën e dytë. Ka qenë Ajazi që ka vendosur gjithçka në ekuilibër edhe pas gafës së Pujës, me Pedron që në fund do rezultonte vendimtar me golin në shtesë, teksa Egnatia merr tri pikët e para këtë sezon.
Pas katër javëve, Egnatia ka pesë pikë, ndërsa Kastrioti ndodhet në fund me dy të tilla.
Pas ndeshjes, për Gol pas Goli trajneri i Egnatias, Gugash Magani tha:
"Fitore në frymën e fundit? Futbolli kështu e ka, është një sport situatash, ne e dominuam lojën. Bëmë një gabim që nga portierët tanë po bëhen të shpeshta, e kisha porositur portierin. Gabime bëhen, jam I kënaqur për pikët, por në lojë them se do rritemi më shumë.
Jemi formatuar vetëm në dy javët e fundit të merkatos, sot na buzëqeshi edhe fati sepse me Skënderbeun në fund mund të kishim marrë tri pikë. Suksesi dhe dështimi janë pjesë e punës sonë, kështu e ka sporti. Na buzëqeshi fati në fund.
U qetësuat dhe e menduat ndeshjen të mbyllur më shpejt? Po gëzonim pa mbaruar ndeshja, edhe pse ju flasim këtë e bëmë. Edhe pse gabuam kur nuk duhej, kemi shumë punë për të bërë. Ne jemi pa shumë histori, por organikën e kemi të pasur dhe bëjmë diferencën në futbollin shqiptar.
I kuqi i Telushit? Dyluftim që Telushi ishte në kundërkohë, ai luan me 60 përqind mundësi dhe nuk ka tradhti. Luan me karakter. Të jemi kokëulur sepse do I hapim punë çdo skuadre. Siç u futëm sot në fushë, do futemi edhe me Vllazninë dhe Kukësin, me këtë grintë", tha Magani.
Lexo gjithashtu
