Situata politike në Kosovë kohët e fundit është turbulluar shumë pas diskutimeve të shkëmbimit të kufijve me Serbinë.
Por dhe sporti është prekur nga zhvillime të tilla. Në një letër të fundit të dërguar nga Presidenti i Komitetit Olimpik të Kosovës Besim Hasani u ka kërkuar të gjitha federatave sportive të Kosovës të komunikojnë me federatat ndërkombëtare në të cilat bëjnë pjesë në mënyrë që të marrin masa ndaj shoqërive sportive serbe të cilat kryejnë aktivitete futbollistike të paligjshme në territorin e Kosovës.
Në një linjë me të ka qenë dhe Ministri i Kulturës dhe Sportit të Kosovës Kujtim Gashi, i cili ka kërkuar forcërisht të ndalohen veprime të tilla që cënojnë pjesëmarrjen e Kosovës në FIFA dhe UEFA.
“Është e papranueshme që pas aq shumë mundimeve, vuajtjeve e sakrificave për të ndërkombëtarizuar sportin e Kosovës, e veçanërisht futbollin, sot të ketë tendenca që të vihet në pikëpyetje anëtarësimi ynë në UEFA e FIFA, nga pretendimet për të transmetuar në Kosovë Ligën e Kampioneve të UEFA-së, përmes Radio Televizionit të Serbisë”, ka shkruar ministri në një letër dërguar sot mediave. “Kosova është e barabartë në UEFA dhe FIFA dhe për këtë më së shumti jemi borxhli ndaj Legjendës së Sportit tonë, Fadil Vokrrit. Është fyerje edhe ndaj tij dhe gjithë atyre që kanë dhënë e sakrifikuar aq shumë për të përjetuar emocionet si ato që kishim në ndeshjen premierë Kosovë – Ishujt Faroe. Nëse lejohet një hap i tillë, esencialisht mund të kontestojë barazinë tonë me shtetet e tjera në UEFA dhe FIFA.
Kosova është shtet i pavarur e sovran dhe Serbia nuk mund të ketë kurrë me asnjë kompetencë mbi Kosovën, as për sport e as për asnjë gjë tjetër. Si Ministër i Sportit, pres që të gjitha institucionet përgjegjëse të kryejnë detyrat e tyre për të garantuar pavarësinë e sportit të Kosovës, qoftë në fushat e blerta apo në ekranet tona televizive. Ashtu siç nuk mundet më Serbia të organizojë ndeshje futbolli në territorin e Kosovës, nuk mundet as të marrë të drejta për transmetime televizive në Kosovë, sepse ndryshe ky do të ishte cenim i integritetit territorial të shtetit tonë”, ka reaguar Gashi.
Letra e Besim Hasanit drejtuar federatave sportive të Kosovës
Loading ...
