Konfliktet politike midis Rusisë dhe Kosovës kanë ndikuar në mënyrë skandaloze dhe në këtë kompeticion mbarëbotëror duke dhënë edhe një herë provën se sporti ndikohet vazhdimisht nga vendimet politike.
Ndalimi i shfaqjes së flamurit të shtetit të Kosovës është vendosur duke e përfshirë simbolin shtetëror në 20 flamujt e ndaluar ku bën pjesë dhe ndalimi i shfaqjes së simboleve të organizatës terroriste ISIS.
Për këtë ngjarje të turpshme ka reaguar Koordinatori Ministrisë së Kulturës, Rinisë dhe Sportit të Kosovës Rexhep Hoti në llogarinë e tij personale në "Facebook".
"Me keqardhje mora lajmin për ndalimin e valëvitjes së flamurit të Republikës së Kosovës në Kampionatin Botëror të Futbollit Rusia 2018, edhe pse FIFA u lejon 211 anëtarëve të saj përdorimin e flamujve, pjesë zyrtare e së cilës është edhe vendi ynë. Edhe më shqetësuese është e dhëna se flamuri i Republikës sonë është renditur në të njëjtën listë me flamujt e organizatave terroriste. Nuk dua t'i kujtoj Këshillit Organizativ të Botërorit në Rusi, se jo shumë kohë më parë, aty u valëvit flamuri i shtetit tonë kur fituesja e medaljes së Artë e Kampionatit Botëror dhe Olimpiadës, Majlinda Kelmendi, u shpall Kampione Evropiane e Xhudos, pikërisht në Rusi. Kjo ndalesë është kryekëput politike dhe e papranueshme për botën e sportit kudo në botë. E dënoj fuqishëm aktin e ndërhyrjes së politikës në sport. Sportistët e Republikës së Kosovës vetëm për një dekadë të ekzistencës së shtetit të pavarur e sovran i dhuruan spektakël të jashtëzakonshëm mbarë botës. Ata nuk e meritojnë që identiteti i tyre i ligjshëm dhe legjitim të dhunohet në forma të papranueshme politike."
Kosova është anëtare me të drejta të plota në FIFA dhe UEFA dhe sjellja e qeverisë ruse ka qenë tërësisht tendencioze ndaj shtetit dhe Federatës së Futbollit të Kosovës.
Lexo gjithashtu
