Presidenti i klubit të divizionit të dytë kolumbian Tigres FC, Edgar Paez, është qëlluar për vdekje, pas humbjes së ekipit të tij.
63-vjeçari teksa ishte duke u kthyer në shtëpi, nën shoqërinë e vajzës së tij, pas humbjes 3-2 në shtëpi ndaj Atletico FC u qëllua për vdekje nga dy burra me një motoçikletë. E gjithë ngjarja ndodhi në afërsi të stadiumit, ndërkohë fatmirësisht vajza e Paez arriti të shpëtojë.
Lidhur me këtë ngjarje të rënda ka ardhur edhe reagimi i klubit të cilët të shkatërruar nga ky lajm i kanë përcjellë ngushëllime familjarëve, miqve dhe kolegëve të Paez.
“Familja Tigres dhe komuniteti sportiv janë të shkatërruar nga kjo ngjarje. Angazhimi i tij ndaj ekipit dhe përkushtimi i tij për zhvillimin e sportit në rajonin tonë la gjurmë të pashlyeshme te të gjithë ata që patën privilegjin ta njohin atë”, thuhej në deklaratë.
Ndërkohë, Presidenti i Divizionit të Madh të Futbollit Profesional Kolumbian, Fernando Jaramillo, u shpreh se Paez u dallua gjithmonë për respektin dhe dashurinë që ka pasur përgjatë gjithë jetës së tij për fushën e blertë. Ai njoftoi se në respekt të Edgar Paez do të mbahet një minutë heshtje në dy ndeshjet e ardhshme.
“Ai u dallua gjithmonë nga respekti për miqtë e tij dhe nga dashuria që shprehte për sportin që ne të gjithë jemi të apasionuar: futbollin”, tha Jaramillo.
Lexo gjithashtu
