Edhe pse po diskutohet shumë gjatë ditëve të fundit, madje edhe nga drejtuesit e klubit të Partizanit se Tirana duhet të hapë dyert e "Selman Stërmasit" për ekipin e kuq, një gjë e tillë duket një temë e mbyllur në kampin bardheblu.
Rreth dy muaj më parë, Partizani bëri kërkesën e parë zyrtare drejtuar klubit të Tiranës për të luajtur në "Selman Stërmasi" ndeshjet si pritës.
Përgjigjja pozitive mungoi, ndërsa së fundmi, ashtu siç pranoi edhe dje në "Ora Skaner" Drejtori Sportiv i të kuqve, Edmond Haxhia, Partizani ka bërë një tjetër kërkesë për këtë çështje.
Por duket se përgjigjja do të jetë e njëtja, negative dhe e prerë "jo" nga ana e Tiranës.
Nuk ka shumë dyshime për këtë gjë, duke iu referuar edhe pohimit të vajzës së presidentit të Tiranës, Refik Halilit në "Procesin Sportiv" disa javë më parë.
Goldi Halili nuk nguroi të ishte e prerë për kërkesën e Partizanit për të luajtur në "Selman Stërmasi" kur pranoi se: "Babi e ka parë Tiranën gjithmonë si pasion jo si biznes. Ne si familje e përjetojmë gjithmonë kështu. Unë si tifoze e Tiranës mund të them se nuk mund ta pranoj që Partizani të luajë në stadiumin tonë", ka deklaruar vajza e presidentit të Tiranës duke i dhënë një përgjigje sa të drejtëpërdrejtë aq dhe diplomatike presidentit të Partizanit".
Pra Partizani, deri në momentin kur të hyjë në shtëpinë e tij që po ndërton presidenti Gaz Demi, do të vijojë të luajë në "Elbasan Arena" dhe kjo është një temë e mbyllur.
Lexo gjithashtu
