Presidenti francez Emmanuel Macron, një tifoz i njohur i futbollit nuk humbet asnjë ndeshje kur gjen mundësinë për ta ndjekur nga shkallët e stadiumit.
Në nëntor 2022 ai udhëtoi në Katar për të parë Kombëtaren e Francës, duke luajtur në Kupën e Botës dhe sigurisht finalen e humbur kundër Kombëtares së Argjentinës të Lionel Messit.
Macron, i cili ka simpati dhe një marrëdhënie të mirë me Kylian Mbappe, u pyet pak ditë më parë, nëse ai mbështet Cristiano Ronaldon apo Lionel Messin. Zgjedhja e tij ishte Cristiano Ronaldo.
“Unë preferoj Ronaldon”, është përgjigjur Macron.
Portugezi nuk ka luajtur kurrë në Francë si Lionel Messi, por të dy kanë fituar trofe ndaj "Gjelave", i pari me Portugalinë në Euro 2016 dhe i dyti me Argjentinën në Botërorin 2022.
Macron ka qenë i lidhur rregullisht me futbollin gjatë viteve të fundit. Madje në mediet e huaja u raportua se presidenti francez ka ndikuar në rinovimin e kontratës së Kylian Mbappe me PSG, deri në vitin 2025.
Lexo gjithashtu
