Kukësi ka mbyllur përgatitjet për ndeshjen me Korabin. Ekipi verilindor i ka dhënë fund përgatitjeve me seancën e fundit stërvitore të zhvilluar në orën 11:00, në stadiumin “Zeqir Ymeir”. Siç njoftohet në faqen zyrtare të Kukësit në internet, trajneri Ernest Gjoka ka pasur në dispozion të gjithë lojtarët që ka grumbulluar për takimin e nesërm, që do të zhvillohet, në orën 14:00, në stadiumin “Zeqir Ymeri”.
Trajneri ka aplikuar një seancë tekniko-taktike dhe ka dhënë edhe udhëzimet e fundit para ndeshjes me Korabin. Ditën e nesërme shpresohet të ketë një pjesëmarrje sa më të madhe të tifozerisë në shkallët e stadiumit pa harruar faktin se dyert janë të hapura dhe hyrja është e lirë, pa bileta. Mungesa e vetme do të jetë Nijas Lena, i skualifikuar për shkak të kartonit të kuq të marrë në ndeshjen kundër Flamurtarit. Barazimi i sotëm i Skënderbeut kundër Tiranës është një motiv edhe më i madh për Kukësin që të kërkojë tri pikët kundër Korabit për t’u shkëputur në vendin e parë të renditjes.
