Portieri i Kukësit, Enea Koliçi, në një deklaratë për “Super Sport”, ka komentuar ndeshjen e kthimit me Austrinë e Vjenës. Ai ka treguar mënyrën se si Kukësi mund të përmbysë humbjen e parë dhe të kualifikohet.
“Është e rëndësishme që të mos pësojmë dhe të shënojmë shpejt. Unë besoj se kemi punuar shumë gjatë këtyre ditëve për ta bërë dicka të tillë. Të gjithë ne, duke filluar nga unë, mbrojtja, mesfusha por dhe sulmi po punojmë që të mos pësojmë dhe të shënojmë minimalisht një gol. Nëse duam të kualifikohemi, kjo është e vetmja mënyrë”, tha portieri i verilindorëve.
Koliçi gjithashtu i dha rëndësi faktit që në këtë ndeshje do të rikthehen në stadium tifozët duke treguar rëndësinë e tyre për ekipin.
“Fakti, që tifozeria do të jetë e pranishme në shkallët e stadiumit është dicka pozitive për ne. Në ndeshjen me Rudarin e ndjemë shumë mungesën e tifozëve, pasi ata na japin një shtytje më të madhe në fushë. Janë lojtari ynë i 12-të dhe është gjithmonë mirë kur ke një lojtar më shumë”, shtoi ai.
Në fund gardiani i Kukësit bëri edhe një koment për forcën e kundërshtarit.
“Austria e Vjenës është një skuadër që ka fituar shumë në vendin e saj dhe ne respektojmë. Por vetëm respekt, jo frikë”, përfundoi Koliçi.
Lexo gjithashtu
