Mungesa e tifozëve në stadiumet shqiptare është shndërruar në një problem serioz në futbollin tonë. Mbështetësit e skuadrave, qoftë dhe atyre elitare nuk janë në nivelet e dikurshme. Për këtë presidenti i Apolonisë, Koço Kokëdhima ka një shpjegim.
Sipas tij, ndryshimi demografik i vendit ka bërë që mos të jetë më lidhja e dikurshme tifoz-skuadër, përkundrazi. Kreu i fierakëve tregon se duhet një punë mjaft e madhe që nga qeveria e deri te klubet më të vogla në Shqipëri.
“Problemi i tifozëve të paktë në shkallët e stadiumit, është i lidhur me ndryshimin demografik të Shqipërisë. Janë ribërë, janë shembur vlerat. Nuk është ndërtuar ajo lidhje mes tifozëve të rinj dhe skuadrës. Është një problem pak kompleks. Së dyti është i lidhur me vetë problemin e futbollit në vend. Nuk është si spektakël në nivelin që publiku pret.
Është një marrëdhënie e cënuar, mes klubeve dhe komuniteteve. S’e kanë angazhimin që të blejnë një biletë, një fanelë për të kontribuar për klubet e tyre. Është një marrëdhënie e pandërtuar. Duhet punë e madhe për ta bërë këtë, nga aktorët dhe faktorët e shoqërisë. Përfshirë qeverinë e deri te klubi dhe Bashkia e fundit”, tha presidenti i Apolonisë në emisionin “Procesi Sportiv”.
Lexo gjithashtu
