Tifozët serbë kanë shkaktuar kaos në Gjermani para ndeshjes mes Crvena Zvezdës dhe Leipzig. Huliganët tashmë janë vënë nën hetim nga policia, pasi kanë përdorur mjete piroteknike, kanë dëmtuar lokalet përreth si dhe kanë vjedhur pije alkoolike në një market.
Policia ka bërë me dije se trazirat kanë nisur para takimit të djeshëm, që ishte i vlefshëm për fazën e grupeve të Champions League.
“Rreth orës 18:20, afro 3 mijë tifozë të Crvena Zvezdës marshuan nga qendra e qytetit në drejtim të stadiumit. Tifozët janë shoqëruar nga një numër i madh i efektivëve. Tifozët kanë brohoritur dhe kanë nisur të hedhin mjete të palejueshme piroteknike, të cilat janë hedhur edhe gjatë lojës. Po ashtu, është konstatuar se janë dëmtuar edhe disa shenja të komunikacionit”, njofton Policia e Leipzigut.
Rreth 800 efektivë kanë qenë të angazhuar për të ruajtur rendin dhe sigurinë në këtë përballje të Champions League. Fatmirësisht nuk pati trazira mes tifozërive. Kujtojmë që Leipzig fitoi mbrëmë me rezultatin 3-1, kurse huliganët “Delije” lanë gjurmët e tyre përmes dhunës e terrorit.
Lexo gjithashtu
