Pakënaqësitë për sjelljen e policisë, nga ana e tifozëve shqiptarë për ndeshjen kundër Izraelit kanë arritur kulmin gjatë ditëve të fundit.
Pas "Shvercerave" që nuk u lejuan të kalonin në kufi me Shqipërinë, apo edhe "Plisave" që u ankuan për sjelljen e policisë, edhe "Illyrian Elite" ka dalë së fundmi me një deklaratë në faqen zyrtare në Facebook ku tregon sipas tyre sjelljen e pahijshme të policisë ndaj tyre.
"Anëtarët tanë nisen si gjithnjë nga të gjitha trevat Shqiptare për tu takuar së bashku në Elbasan. Deri këtu ishte gjithçka në rregull, deri në momentin që filluam futjen e materialeve për ne stadium. Pas një ore "luftë" dhe debat me forcat policore arritëm ti bindim të vendosim banerin dhe të na lejojnë shpalosjen e koreografisë së përgatitur për këtë ndeshje.
Filloi hyrja e te gjithë anëtarëve për në stadium dhe disa prej tyre detyrohen të kthehen pas për të kthyer tupanin dhe megafonin, pasi në mënyrë të pa shpjegueshme nuk lejohen të futen në stadium. Diçka e tillë nuk kishte ndodhur dhe as nuk mund të ndodhë në asnjë stadium të botës, përveçse në vendin tonë, që si gjithnjë tifozët shihen si kriminelë. Kontrolli ndaj tifozëve arriti deri aty sa kërkohej edhe heqja e atleteve.
Pas hyrjes në tribunë rreth 20 policë qëndronin aty me ne gjatë gjithë ndeshjes. U ndalua hapja e një banderole me mbishkrim "1312- Liri për ultrasit". Hapja e kësaj banderole nuk u ndalua për shkak të shkrimit, forcat policore as nuk e morën mundimin për ta lexuar thjesht e ndalën shpalosjen e kësaj banderole. Gjendja arriti deri aty sa në tribunë duhet të këndoheshin kënge të cilat për policat ishin të përshtatshme.
Cenim i drejtpërdrejt i demokracisë dhe lirisë së fjalës. Duke marrë shkak nga kjo sjellje e shtetit dhe Federatës Shqiptare të futbollit, ju themi se ne kësaj here vepruam siç deshët ju, duke filluar nga ndeshja e radhës do te jemi ne ata që do vendosim çfarë do bëhet dhe çfarë jo! Ju kurrë nuk mund ta doni Kombëtaren më shumë se ne!", shkruhej në postimin e tifo-grupit të Kombëtares, "Illyrian Elite".
Lexo gjithashtu
