Jahmir Hyka rikthehet në Kombëtare pas dy vitesh pritjeje. Trajneri De Biazi është bindur më në fund për të riveshur kuqezi mesfshorin me tipare sulmuese, ndërsa vetë futbollisti pranon se kishte kohë që e priste një “telefonatë” nga numri 1 i stolit të ekipit tonë Kombëtar. Në një intervistë për “SuperSport”, Hyka pohon se është i lumtur që do të jetë sërish pjesë e kuqezinjve, ndërsa tregon edhe objektivat e tij me përfaqësuesen tonë. Megjithatë, mesfushori me tipare sulmuese shprehet se ende nuk i ka ardhur në mënyrë zyrtare ftesa për në Kombëtare. Por, një gjë e tillë në fakt është një formalitet, sepse ditën e djeshme ishte trajneri De Biazi që rrëfeu se Hyka do të jetë në listën e tij për ndeshjet e Eliminatoreve të Botërorit “Rusi 2018”.
“Normalisht jam ndier i lumtur për fjalët e trajnerit sepse u bë një kohë e gjatë që po luaj rregullisht dhe kam bërë ndeshje të mira me klubin. Mund të them që e kam pritur një ftesë, megjithëse ka vonuar pak, por tani jam i lumtur për këtë gjë. Megjithëse nuk mund të konfirmoj asgjë pasi ende nuk ka ardhur një ftesë zyrtare kështu që na duhet të presim pak. Asnjëherë nuk i kam humbur shpresat për rikthimin në Kombëtare dhe këtë e kam treguar edhe në kampionatin e kaluar dhe tani me Lucernën duke ulur kokën dhe punuar duke pritur shansin që shpresoj të vijë në këtë moment. Normalisht që nuk mund të them që unë i vetëm mund të bëj ndryshimin e madh në Kombëtare, por besoj se çdo lojtar është i rëndësishëm dhe besoj se me cilësitë e mia mund ta ndihmoj skuadrën. Si çdo lojtar dhe unë kam një ndjesi të vecantë kur luaj me Kombëtaren dhe nëse me jepet mundësia të luaj nuk e diskutoj që jo 100% por 120% do të jap për Kombëtaren”.
Hyka regjistron 37 aktivizime si dhe dy gola të shënuar me fanellën kuqezi nga 2007 deri në 2014, mund të thuhet me plot gojën se ai është gati të rikthehet për të dhënë maksimumin.
Lexo gjithashtu
