Endri Çekiçi mbetet një nga lojtarët shqiptarë më të talentuar të momentit, ndërsa këtë sezon do të vijojë të luajë me Lokomotivën e Zagrebit, ekipi "satelit" i Dinamos së Zagrebit që zotëron edhe kartonin e mesfushorit pogradecar. Ndërkohë që 19-vjeçari vijon të mbetet një nga futbollistët më të rëndësishëm të ekipit të Shpresave të Shqipërisë, duke premtuar shumë për të ardhmen. Në një prononcim për newsport.al, Çekiçi flet edhe për largimin e shokut të tij më ngushtë te ekipi i Shpresave, Milot Rashica, i cili vendosi t'i bashkohet Kosovës.
"Është një zgjedhje personale dhe mendoj se duhet ta respektojmë. Miloti është një mik shumë i mirë për mua dhe tashmë mbetet vetëm t'i urojmë suksese me Kosovën", shprehet Çekiçi.
I pyetur për faktin se largimi i disa lojtarëve Kosovarë nga kombëtarja kuqezi mund të jetë një shans për futbollistët shqiptarë që të kenë më shumë hapësira, talenti i Lokomotivës së Zagrebit pranon me modesti se: "Nuk mund ta them një gjë të tillë. Edhe futbollistët kosovarë kanë shumë kualitet dhe kështu rritet konkurrenca brenda ekipit.
Një gjë e tillë rrit edhe cilësinë e skuadrës sonë Kombëtare. Jemi të gjithë shqiptarë, pavarësisht se tashmë kemi dy kombëtare", deklaron Endri Çekiçi, cili në fund flet edhe për skuadrën ku aktivizohet aktualisht: "Jam përshtatur tashmë te Lokomotiva dhe këtë sezon do të jap sërish maksimumin për të arritur objektivat që kemi".
Lexo gjithashtu
