Redon Xhixha ishte i ftuar në nje lidhje të drejtpërdrejtë me emisonin “Analizë Kuqezi” nga moderatori Sokol Xhihani në Supersport. Ish-sulmuesi i Tiranës foli për aventurën e tij të re te Qarabag, ndryshimet me futbollin shqiptar, Kombëtaren, Tiranën dhe dëshirën për t’u bërë një legjendë si Ansi Agolli në Azerbajxhan.
Kemi folur shpesh për transferimet nga Superiorja, si ti, Skuka, Seferi, etj. Kjo tregon se kampionati shqiptar ka vlera…
Natyrisht që po. Ne jemi munduar të bëjmë më të mirën në fushë, në Superiore dhe mundi ynë është shpërblyer. Kemi bërë trasnferime të mira dhe shpresoj të na ecë sa më mirë edhe në të ardhmen.
Si ndryshon futbolli nga Shqipëria në Azerbajxhan?
Këtu është futbolli më i shpejtë dhe më fizik. Në Shqipëri luajnë shumë për barazim dhe ka shumë vonesa loje. Këtu ka ritëm shumë më të lartë dhe gjen shumë më tepër hapësira. Ka shumë ndryshim, sidomos në ritëm dhe shpejtësi loje, por edhe në aspektin fizik.
Të ka ndihmuar fakti që një shqiptar tjetëer si Ansi Agolli ka lënë gjurmë te Qarabag?
Unë kam folur me Ansin edhe para se të vija këtu, por këtë muaj kam vënë re që atë e duan shumë që të gjithë. Është një legjendë në këtë klub dhe e përmendin shumë në klub. Shpresoj që edhe unë një ditë të bëj një vend si të Ansit, në klubin e Qarabagut.
Çfarë emocionesh përjetuat në debutimin në këtë fazë të Conference League?
Unë kam luajtur në Play Off me Tiranën, por këtu ishte një tjetër emocion. Kisha shumë emocione, por u zeruan kur zbrita në fushë, pasi fokusi ishte te loja.
Sa herë i ke parë traversën dhe rastin e humbur në fund?
I kam parë disa herë, por fati nuk ishte me mua dhe nuk kam çfarë të bëj. Shpresoj që shumë shpejt do të vijnë edhe golat e mi.
Na tregoni pak si ju erdhi oferta e Qarabagut?
Kur mora ofertën, e mendova si shaka, dilnin disa ekipe ditë pas dite që më donin. Isha në grumbullim dhe u thosha shokëve të skuadrës ja ku doli dhe një tjetër. Kur më mori menaxheri, më tha se marrëveshja ishte mbyllur, aty e kuptova që ishte serioze. Mendoj se kam bërë zgjedhje të mirë, sepse Qarabagu është skuadër e njohur në Evropë, pastaj në Azerbajxhna është forcë e parë.
Ndikoi grumbullimi me Kombëtaren te ky transferim?
Nuk di ta them, por normal mund të ketë pasur ndikim. Sepse kur të grumbullon Kombëtarja do të thotë se ke cilësi. Çdo lojtar e ka ëndërr të ftohet nga Kombëtarja, është budallallëk të them që nuk e mendoj Kombëtaren. Sigurisht nuk pretendoj të luaj direkt, por të testohem dhe, nëse jam i zoti, të aktivizohem.
U dobësua Tirana me largimin tënd?
Tirana është Tirana, veç me emër i mposht kundërshtarët. Nuk besoj se është dobësuar, ka lojtarë të tjerë shumë të mirë. Nuk kanë Xhixhën, por kanë Hasanin, Patrick, Lushkjen, Nikçin, Abazajn… E kam detyrim moral që në rast së kthehem një ditë në Shqipëri, të luaj më Tiranën.
Lexo gjithashtu
