Paulo Fonseca është vënë në “lupën” e mediave, gazetarëve, opinionistëve të futbollit italian. Disa shprehen pro dhe disa kundër tij.
Milani kishte ndërtuar një ecuri pozitive qysh prej derbit, por këto dy humbje radhazi, një për Champions e një për llogari të kampionatit rikthyen debatin se a është ish-trajneri i Romës i duhuri për drejtimin e Milanit.
I pyetur në një intervistë, Giovanni Galli, portier i dikurshëm i Milanit ka dhënë opinionin e tij mbi “çështjen” Fonseca. Ai ka qenë duke parë ndeshjen Fiorentina-Milan pasi mos të harrojmë ai ka mbrojtur në një pjesë të karrierës edhe portën e “Violave”.
“Fiorentina-Milan ishte një ndeshje që ia vlente për t’u parë. Fiorentina u paraqit mirë pasi kapën pikat e dobëta të Milanit, që kurrsesi nuk ishte i papërmbajtshëm. Hero i padiskutueshëm i takimit ishte De Gea me pritjet e 2 penalltive.
Fillimisht, nisja e sezonit nuk ishte e mirë. Me fitoren në derbi u duk sikur çdo gabim u rregullua, por në takimin e djeshëm Milani bëri 2 hapa pas. Për mendimin tim do të ishte gabim shkarkimi i Fonseca-s. Ai është një trajner që ka shumë ide të mira në futboll. Mjafton vetëm që lojtarët t’a kuptojnë filozofinë e tij”, e mbyll Galli.
Milani do të kërkojë të harrojë disfatën ndaj ekipit nga Firence gjatë pauzës, për t’u rikthyer me mentalitetin e duhur ndaj Udinezes që po rezulton “surpriza” e Serie A.
Lexo gjithashtu
