Ndeshja mes Serbisë dhe Shqipërisë është kryefjala e mediave sportive. Për shkak të kaluarës, kjo përballje ngjall shumë interes dhe pritet të jetë shumë e luftuar në fushën e lojës.
Në prag të kësaj sfide ka folur ish-futbollisti i Serbisë. Nenad Tomovic në një intervistë për “Sportinho”, i është rikthyer edhe një herë 14 tetorit të 2014. Futbollisti serb shprehet i bindur se droni i hedhur nga Ballist Morina në mes të Beogradit ishte i mirëpërgatitur dhe se futbollistët kuqezi kishin dijeni se diçka e tillë do të ndodhte.
“Droni në Beograd? Sinqerisht, ishte një provokim i madh ta shihnim atë flamur të valëvitej mbi kokat tona. Stefani, sipas mendimit tim, reagoi me zgjuarsi dhe e hoqi menjëherë. Mund ta shihni nga kjo, nga reagimi i tyre, se si ata vrapuan dhe filluan ta mbronin atë flamur. Mendoj se gjithçka ishte e planifikuar, e organizuar, pastaj të gjithë filluam të vraponim, filluan incidentet, por siç thashë pak më parë, mendoj se gjithçka duhej të ishte në fushë dhe të mos mbaronte në atë mënyrë, por ky ishte padyshim qëllimi i tyre. Atë që planifikuan, më në fund e arritën.
Atmosfera pas 1 viti në Elbasan? Sa u përket brohoritjeve, stadiumi ishte plot, por nuk mund të krahasohet me atmosferën që ishte këtu, pasi ai stadium i mbushur nuk u ndje. Sikur të mos ishin aq të zhurmshëm, nuk ishin aq fanatikë.
Ndeshja Serbi – Shqipëri në Leskovac? Mendoj se kudo që të luhet ndeshja, në Beograd apo Leskovc, Zajeçar, Kragujevc apo Nish, qëllimi duhet të jetë i njëjtë. Mendoj se të gjithë do të vijnë sa më shumë të jetë e mundur për ta mbështetur ekipin tonë kombëtar. Çelësi do të jetë durimi dhe të qenit më të zgjuar në mënyrë organizative, të mos ngutemi dhe të mos nxitohemi për të shënuar një gol me çdo kusht. Sigurisht, ne kemi cilësi shumë më të lartë si individualisht ashtu edhe si ekip, kështu që mendoj se i kemi të gjitha parakushtet për ta fituar këtë ndeshje”, ka përfunduar serbi.
Kujtojmë se dueli Serbi - Shqipëri do të luhet ditën e shtunë në orën 20:45 në Leskovac. Duel i vlefshëm për kualifikueset e Kupës së Botës 2026.
Lexo gjithashtu
