Robert Lewandowski po vazhdon shkëlqimin e tij te Barcelona, me polakun që mbrëmjen e djeshme ia doli të shënonte dy gola në fitoren 5-0 ndaj Young Boys. Sigurisht që kjo dopietë do të mbahet mend gjatë nga sulmuesi.
Kjo është hera e parë që Lewandowski shënon ndaj një ekipi zvicerian në një kompeticion të tillë. Në këtë mënyrë tashmë 36-vjeçari ka shënuar kundër 16 ekipeve të vendeve të ndryshme, duke barazuar rekordin e Cristiano Ronaldos dhe Ruud van Nistelrooy.
Kapiteni i Polonisë tash e sheh veten prapa lojtarëve legjendarë si Alessandro Del Piero, Zlatan Ibrahimović e Thomas Müller, të cilët kishin shënuar kundër klubeve nga 18 vende të ndryshme evropiane.
Përpara tyre gjenden Lionel Messi e Raúl González, që kanë realizuar ndaj ekipeve nga 19 shtete, kurse listës i prin Karim Benzema. Ish-futbollisti i Lyonit dhe Real Madridit iu ka shënuar gola ekipeve nga 20 vende të ndryshme evropiane në Champions.
Lewa e kaloi mbrëmë Benzeman sa i përket numrit të klubeve që iu ka shënuar gola në Champions. Lewandowski iu ka shënuar 35 ekipeve, kurse Benzema ishte ndalur me shifrën 34. Rekordin e mban Lionel Messi, i cili iu kishte shënuar 40 ekipeve të ndryshme, kurse Cristiano Ronaldo është i dyti me 38.
Lexo gjithashtu
