Blerim Xhemaili ishte autori i golit që Zvicra shënoi ndaj Kosta Rikës pak ditë më parë. Lojtari me origjinë shqiptare ka treguar emocionet e këtij Botërori, ku specifikon se nuk do festonte në të njëjtën mënyë që festuan Xhaka dhe Shaqiri në rast se do kishte bërë gol në ndeshjen ndaj Serbisë.
Në intervistën e dhënë për "Report TV", Xhemaili zbulon se përherë ka festuar me shkonjën "L", që simbolizon djalin e tij. Futbollisti shqiptar i Zvicrës ka folur dhe për largimin e mundshëm nga Kombëtarja, ku specifikon se tashmë ka arritur një moshë ku asgjë nuk dihet dhe se gjithçka pritet të mësohet ditët e ardhshme.
- Blerim, keni përmbyllur kampionatin e dytë Botëror, përsëri me një gol, si ndiheni tashmë?
Mirë. Mendoj se kemi luajtur një Botëror shumë të mirë për Zvicrën. Jemi të kënaqur. Tentuam dhe donim të kalonim kundër Suedisë, por ky është futbolli. Jemi të kënaqur edhe kështu, me kaq sa arritëm.
- I keni bërë krenar të gjithë shqiptarët. Çfarë mesazhi ju jepni atyre që iu kanë përkrahur?
Ndeshja kundër Serbisë ka qenë speciale për ne. Kemi qenë katër shqiptarë që luanim për Zvicrën. Kemi hyrë në fushë me idenë që të fitonim ndeshjen dhe jo me frymë politike. Para lojës ka pasur plot provokime prej serbëve, por i harruam ato. Kishim në kokat tona vetëm ndeshjen, donim ta fitonim atë ndeshje. Ka qenë me shumë rëndësi ta fitonim dhe e fituam. Sigurisht i kemi bërë krenar shqiptarët për golat e shënuar, por e rëndësishme është të fitonim.
- Graniti dhe Xherdani festuan me shqiponjë golat. Po të kishit shënuar edhe ju, do e bënit simbolin e Shqiponjës?
Mendoj se ajo ka qenë spontante dhe jo e paramenduar. Unë e festoj golin çdo herë me 'L'-në e djalit tim. Po të kisha shënuar kundër Serbisë, do kisha festuar me 'L'-në e djalit tim. Djali im ka më shumë rëndësi për mua se gjërat politike.
- Keni ndjerë afrimitet nga ana Zvicrës?
Gjithmonë federata ka qenë pas nesh edhe për lojtarët që janë me rrënjë shqiptare. Para ndeshjes kemi folur bashkë dhe e dinim që do kishim provokime. Ka qenë një gjë shumë e mirë sepse Zvicra i ka pranuar krejt shqiptarët. Ne jemi krenar që mund t'i japim Zvicrës diçka, sepse Zvicra ka dhënë gjithçka për ne.
- Për ju ky është Botërori i fundit?
Mendoj se 32 vjet i kam tashmë. Pas 4 vitesh i bie 36 vjeç.
- Karrierën do ta vazhdoni në Itali?
Po, sigurisht do vijoj të luaj në kampionatin italian.
Lexo gjithashtu
