Çështja e administrimit të stadiumit "Loro Boriçi" është një temë "e nxehtë" në futbollin shqiptar dhe veçanërisht në atë shkodran.
Pritet që gjatë këtyre ditëve, zyrtarët e FSHF-së të zhvillojnë një takim me drejtuesit e bashkisë së Shkodrës për të gjetur një rrugë përfundimtare dhe zgjidhjen e këtij problemi.
Sipas kryetares së bashkisë së Shkodrës, Voltana Ademi, për momentin nuk do të ketë asnjë marrëveshje konkrete pa u mbaruar totalisht punimet në "Loro Boriçi".
FSFH i ka propozuar bashkisë së Shkodrës se mes dy institucioneve në fjalë do të ketë ndarje të të ardhurave nga biletat për të bërë kështu një bashkë-administrimin korrekt
Por, sipas kryebashkiakes së Shkodrës, marrëveshjet përfundimtare për këtë temë do të zhvillohen kur të mbarojë gjithçka që është parashikuar të ndërtohet në projektin e stadiumit.
Vetëm në këtë rast do të zgjidhet çështja e kontratës së administrimit mes bashkisë dhe FSHF-së.
Sipas propozimit të federatës, bashkia e Shkodrës do të përfitojë gjysmat e të ardhurave nga biletat e ndeshjeve të Vllaznisë në Superligë dhe në Kupat e Europës nëse kuqeblutë do të marrin pjesë.
Gjysma tjetër e të ardhurave do t'i takojë FSHF-së.
Ndërkohë, bashkia e Shkodrës nuk do të përfitojë asnjë qindarkë nga biletat e ndeshjeve të Kombëtares, pasi këto para do t'i shkojnë FSHF-së që do të administrojë dhe menaxhojë biletat për ndeshjet e Shqipërisë.
Lexo gjithashtu
