Jules Kounde është transferimi i fundit te Barcelona. Mbrojtësi francez ka firmosur sot kontratën, teksa më pas ka folur në prani te mediave. 23-vjeçari është shprehur mjaft i lumtur dhe i gatshëm për këtë sfidë të re.
Ai e vlerëson shumë Barçën, duke u ndjerë krenar për veten që ndjehet në një klub si Barça. Nga francezi nuk kanë munguar falenderimet. Më poshtë mund të lexoni një pjesë nga fjala e tij.
“Jam shumë krenar për veten time që jam në një klub kaq të madh si Barcelona. Falenderoj presidentin dhe tifozët për dashurinë që më kanë treguar. Gjithmonë e kam ndjerë vlerësimin e trajnerit, ai donte shumë që unë të vija këtu. Kjo ishte shumë e rëndësishme për mua sepse është një fazë shumë e rëndësishme në karrierën time.
Xavi më kërkoi të angazhohem, unë e di se çfarë kam për të bërë. Njohuria ime për La Liga do t’i thjeshtojë gjërat. Por gjëja e rëndësishme është të përshtatem me stilin e Barcelonës dhe të njoh shokët e mi të skuadrës.
Konkurrenca? Jam i qetë, jam këtu për t’u rritur sepse jam ende i ri. Do të bëj atë që më kërkon trajneri. Të kesh konkurrencë është gjë e mirë. Barcelona ka shumë lojtarë të talentuar. Kam ardhur për të dhënë kontributin tim, jam shumë i lumtur që jam këtu. Do të takoj sërish Dembele, të cilin e njoh mire sepse jemi shokë në kombëtare”, u shpreh mbrojtësi i Barçës.
Kujtojmë se mbrojtësi i qendrës ishte pjesë e Sevilla-s, para se të transferohej te katalanasit për rreth 50 milionë euro. Në garë për të ishte dhe Chelsea, por blaugranasit u treguan më të shkathët, duke fituar shërbimet e Koundes.
