Kombëtarja e femrave në volejboll do të luajë pas dy ditësh në Ligën e Europës, teksa më datat 9-11 qershor do të përballet me Finlandën, Austrinë dhe Bjellorusinë në kryeqytet, në mjediset e National Olimpik Park.
Vajzat kuqezi që drejtohen nga trajneri Altin Martiri ndodhet në Grupin A dhe do të zhvillojnë para fansave takimet e para kualifikuese, me synimin për të shkuar në fazën finale. E bindur se mund t’ia dalin mbanë është volejbollistja më shtatlartë e ekipit kuqezi, Sava Thaka, e cila shprehet:
“Unë besoj shumë te skuadra, ashtu sikurse edhe pjesa tjetër e kombëtares. Ky besim na buron nga puna e bërë gjatë gjithë këtij muaji në stërvitje, ku impenjimi ka qenë maksimal. Ne synojmë që të kalojmë grupin dhe të shkojnë në fazën finale”, tha Sava Thaka.
Volejbollistja korçare sezonin e fundit luajti për herë të parë jashtë Shqipërisë, me skuadrën polake të KSZO Ostroviecit.
"Ishte viti im i parë që luaja jashtë Shqipërisë dhe natyrisht që ndryshimi mes volejbollit shqiptar dhe atij polak ishte mjaft i madh. Kjo përvojë më ka bërë të mësoj mjaft gjëra të reja, që do të më vlejnë shumë për të ardhmen. Përvojë të cilën dua ta transmetoj te skuadra dhe ta tregoj në ndeshjet që do të luaj me fanellën kuqezi”, u shpreh ajo.
Shtatlarta beson te skuadra, puna e kryer dhe falënderon Federatën për mbështetjen e dhënë, duke premtuar se do t’ia shpërblejë në parket me fitore.
"Është një grup i ri vajzash. Këtë vit ka shumë prurje të reja dhe kjo ka sjellë një frymë të re në ekipin kombëtar, gjë që transmetohet çdo ditë në stërvitje, pasi harmonia është e madhe dhe kjo ndikon në një atmosferë të mirë brenda skuadrës. Forca e grupit është arma jonë kryesore, ashtu si edhe një vit më parë, ndaj do të tentojmë të përsëritimin ato rezultate mjaft të mira”, u shpreh volejbollistja kuqezi.
Lexo gjithashtu
