Partizani zhgënjeu në finalen e titullit kampion, me “demat” që i dorëzuan Egnatias kurorën e trofeut. Një humbje që sigurisht do të sjellë në revolucion të vërtetë te kryeqytetasit, pasi këtë sezon skuadra nuk ka patur paraqitjet e dëshiruara, duke mbyllur vitin pa trofe.
Aktualisht ekipi me në krye Orges Shehin ka marrë pushimet, teks do të rikthehen në fushën e lojës pas disa javësh. Disa lojtarë mund të mos rikthehen më te Partizani, pasi janë në fundin e kontratave me klubin.
Kështu Eljon Sota, David Atanaskovski janë dy lojtarët e parë të cilëve iu përfundon kontrata në fund të qershorit. Me asnjërin futbollist klubi nuk ka nisur bisedimet për rinovimin e kontratës dhe në këto kushte largimi i tyre duket i sigurtë. Tedi Cara dhe Valentino Murataj gjithashtu u përfundon kontrata, por është aktivizuar opsioni shtesë i parashikuar në kontratën e tyre. Gjithsesi pavarësisht kësaj, qqëndrimi i tyre nuk është ende i sigurtë.
Ndërkohë “pezull” është edhe Maguette Gueye, i cili me shumë gjasa do të shitet dhe do të sjellë të ardhura në arkat e kryeqytetasve. Edhe Mensah mbetet me “valixhe “ në duar, teksa merkato pas merkato përflitet për një largim nga të kuqtë.
Nga ana tjetër të larguar mund të kosiderohen Xhuliano Skuka dhe Bozo Mikulic. Të parit i ka përfunduar huazimi nga Metz, ndërsa i dyti është “zhdukur” pa lënë asnjë gjurmë.
Lexo gjithashtu
