Orges Shehi ka folur pas fitores 2-1 kundër Partizanit në derbi, fitore që i dha titullin e 26-të kampion bardhebluve. Trajneri i Tiranës u shfaq me të drejtë mjaft i lumtur në këtë triumf të ekipit të tij ku nuk mungoi as festa para mikrofonit të Supersport me lojtarët që e surprizuan. Në fjalën e tij pas sfidës, tekniku i kampionëve deklaroi:
“Bluza e tretë që më lagin. Ia mora këtë Arsenit. Unë mendoj që gjithë merita i shkon këtyre çunave. Prej datës 5 korrik kanë qenë të palodhur. Më kanë duruar pak shumë sepse kam ndryshuar disa herë skemën. Jam shumë i nderuar që drejtoj këtë klub. Është privilegj i madh që drejtoj këta lojtarë.
Ndeshja? Është e vërtetë që në 3 ndeshjet e fundit s’kemi qenë ku duhet. E kam thënë dhe herë tjetër. Donim sot të ishim protagonist përballë një rivali historik. U munduam të luajmë në mënyrë tjetër. Dëmtimi i Tozhevskit na e vështirësoi. Skuadra luajti njësoj edhe kur pësuam gol. Kur një ekip është në disavantazh do forcë karakteri shumë për të përmbysur rezultatin.
Totre dhe Seferi? Ndryshuam duke futur Taulantin në majë. Para ndeshjes i thashë që nuk po shoh parullën “No Totre, No Party”. Dihen vlerat që ka ai.
E ardhmja? Është një temë që nuk dua ta diskutoj. Kontratën s’dua ta diskutoj. Ka kohë reflektimi si për mua, si për drejtuesit.
Pasi ndërtuam grupin, filluam duke luajtur jo mirë. Pas përfundimit të fazës, ne u lidhëm më shumë me njëri-tjetrin. Gjithë kundërshtarët i kemi dominuar. Skuadra po fitonte edhe me mungesa. Ishte forca që ne e kuptuam sa të fortë jemi. Ne kemi pasur vështirësi, por i kemi mbajtur për brenda. Ecuria e fazës së parë, bëri që të na rritej besimi. Sidomos pas ndeshjes së dytë të fazës së dytë, kuptuam që vetëm ne mund ta humbnim.
I preferuari? Totre është një lojtar që të kupton sa hap gojën. Me Taulantin jam shumë i lidhur. Ilioni dhe Genti janë pjesë e imja, gjithashtu edhe Hoxhallari, pjesë e stafit. Por, gjithmonë duke mos e tejkaluar me dy standarte. Standarti ka qenë i njëjtë. Mos të harroj ndonjë tjetër.
Titulli i parë me Skënderbeun? Më ka shijuar titulli i parë me Tiranën. Kur je trajner, përgjegjësia është e gjitha e jotja. Kur isha lojtar, është më e lehtë sepse ke vetëm punën tënde. Është kënaqësi shumë e madhe, nuk përshkruhet me fjalë.
Dedikimi? Është për familjen time, i merr shumë kohë. Dedikimi shkon për bashkëshorten, dy fëmijët dhe nënën time. Pastaj shpërndahet. S’ka qenë e lehtë për mua. Skepticizmi ka qenë i madh. Ke edhe sfidë me veten tënde. Kjo është kënaqësia më e madhe, të bësh tifozët për vete. Unë fatkeqësisht s’kam luajtur kurrë me këtë skuadër”, tha ai.
Lexo gjithashtu
