Ndeshja e nesërme është tashmë një arritje e madhe për Marokun, duke pasur parasysh se si ata kanë bërë histori si skuadra e parë afrikane që ka arritur në katërshen e fundit, duke shtangur Belgjikën, Spanjën dhe Portugalinë. Trajneri i Marokut, Walid Regragui, ka zbuluar se nuk do të ketë plan të veçantë për të ndaluar Kylian Mbappe kur të përballen me Francën në gjysmëfinalen e Kupës së Botës.
Pavarësisht se nuk ka dalë me një plan të specializuar për të ndaluar Mbappe, Regragui është i bindur se mbrojtësi i djathtë Hakimi, i cili është një nga miqtë më të ngushtë të Mbappes në PSG, është mjaft i mirë për ta bllokuar atë në stadiumin “Al Bayt”.
“Ata janë dy kampionë, të cilët nuk do të bëjnë dhurata. Achraf është shumë i motivuar për të rrahur mikun e tij. Sa më shumë të ecim, aq më të vështira janë ndeshjet. Ne po luajmë kundër kampionëve të botës me lojtarëve të klasit botëror dhe një trajner shumë të mirë, ndoshta më i miri në botë.
Por ne do të tregojmë dëshirë të madhe dhe do të përpiqemi të bëjmë një tjetër mrekulli. Pse të mos arrijmë në finalen e Kupës së Botës? Ne kemi ardhur në këtë turne për të ndryshuar mendimet brenda kontinentit tonë. Nëse themi mjafton gjysmëfinalja, nuk jam dakord.
Ne nuk jemi të kënaqur me gjysmëfinalen dhe duke qenë skuadra e parë afrikane që e bën këtë. Ne duam të shkojmë më tej. Është një lojë me nokaut dhe kur ke dëshirë, përkushtim dhe mbështetjen e turmës, mund ta fitosh atë.
Ne jemi një nga katër skuadrat më të mira në botë tani dhe duam të arrijmë në finale. Skuadra më e mirë, Brazili, tashmë është eliminuar. Ne jemi te uritur. Nuk e di nëse do të mjaftojë, por ne duam që Afrika të jetë në krye të botës. E di që nuk jemi favoritë, por kemi besim”, ka theksuar tekniku i marokenëve.
Lexo gjithashtu
