Mbrojtësi Ilir Blakqori do të dalë sot për herë të parë në stërvitje me ekipin e Partizanit. Seanca stërvitore që do të nisë në orën 17:00, në “Qendrën e Ekipeve Kombëtare” në Kamëz do t’i japë startin përgatitjeve të skuadrës për Champions League dhe sezonin e ri.
Futbollisti i afruar nga Llapi i Kosovës do të veshë për herë të parë fanellën e “demave”. Kosovari shihet si një investim për të ardhmen dhe drejtuesit kanë besim tek ai. Megjithatë nuk përjashtohet mundësia që Blakqori të përfundojë edhe te Partizani B.
Mbrojtësi flet për afrimin te Partizani: “Jam shumë i lumtur që kam arritur marrëveshjen me Partizanin, pasi është një ndër klubet më të mirë në Shqipëri. Marrëveshjen me klubin kam arritur ditën e mërkurë me të kuqtë. Tani do të jem futbollisti më i ri i të kuqve. Jam shumë i lumtur që kam arritur marrëveshjen, pasi do mundohem që të bëj më të mirën për klubin. Mendoj se do të arrij suksese me ekipin dhe i premtoj tifozerisë se do të bëj më të mirën për fanellën e kuqe. Shpresoj që t’ua shpërblej edhe besimin e dhënë drejtuesve të Partizanit”.
Seanca e parë stërvitore do të nisë me mungesa të mëdha, por do të kristalizojë edhe më tej largimet e futbollistëve që mbyllën edicionin e shkuar.
Lexo gjithashtu
