Dritan Dervishi, ish-drejtor i Partizanit dhe Kukësit ka reaguar lidhur me çështjen e Ballist Morinës pas lajmit, se ky i fundit do ekstradohet nga shteti serb lidhur me ngjarjen e ndeshjes Serbi-Shqipëri që ndodhi gati dy vite më parë.
Dritan Dervishi ka sjellë reagimin e tij për Newsport.al lidhur me ngjarjen e fundit, ku i kërkon qeverisë si qytetar të mbrojë të drejtat e një qytetari të pafajshëm. Ai kërkon nga Kryeministri i vendit të mbrojë Ballist Morinën me forcë, sepse sipas tij, një shtet që nuk mbron djemtë e tij është një shtet i falimentuar.
“Në këto momente që të gjithë flasin për merkato, një djalë shqiptar rrezikon ekstradimin drejt Serbise....! Ballist Morina është hero për mua dhe unë si qytetar i këtij vendi i kërkoj qeverisë tonë të mbrojë të drejtat e një qytetari të pafajshëm… Nuk mund të ekstradohet në një vend si Serbia që ka një urrejtje për çdo shqiptar Ballist Morina... kërkoj nga kryeministri të ndërhyjë për të mbrojtur Ballist Morinën me forcë, se një shtet që nuk mbron djemtë e tij është një shtet i falimentuar...”
Morina ka dalë katër ditë më parë në Gjykatën e Shkallës së Parë të Dubrovnikut, ku togat e zeza kanë vendosur ekstradimin e tij në Serbi, pasi sikundër dihet prej afro dy vitesh në emër të këtij shtetasi ka një urdhër ekstradimi nga shteti serb lidhur mbi ngjarjen e ndeshjes Serbi-Shqipëri ku ngritja e një droni me një baner të mbishkruajtur Autochtonus solli trazira në stadium dhe më pas ndërprerjen e ndeshjes.
Lexo gjithashtu
