Lionel Messi shënoi dje golin e 500-të në karrierë me fanellën e Barcelonës. Ishte pikërisht goli i realizuar nga argjentinasi në minutën e 92-të kundër Real Madrid që i dha fitoren 3-2 katalanasve.
Një realizim historik, jo vetëm për tri pikët në "El Klasiko", por edhe për faktin se mund të vendosë fatin e kampionatit për Barcelonën.
Messi me katalanasit ka luajtur 576 ndeshje në të gjitha kompeticionet dhe ka realizuar 500 gola, 60 prej të cilëve me 11-metërsh, ndërsa 26 nga goditjet e dënimit.
Sulmuesi argjentinas debutoi me katalanasit në sezonin 2004-2005. Messi ka realizuar 343 gola në La Liga me Barcelonën, 94 në Champions League, 43 në Kupën e Mbretit, 12 në Superkupën e Spanjës, 5 në Kupën e Botës për klube dhe 3 gola i ka shënuar në Superkupën e Europës.
Gjatë karrierës së tij si futbollist, Messi me Barcelonën ka arritur të shënojë gjatë një ndeshjeje të vetme 5 gola, ka realizuar 4 herë "poker", 32 "tripleta" dhe 103 herë ka shënuar dopietë.
Lexo gjithashtu
