Kombëtarja shqiptare e minifutbollit merr pjesë në Kupën e Botës që po zhvillohet në Essen të Gjermanisë. Pas dy ndeshjeve të para në fazën e grupeve, kuqezinjtë ia kanë dalë të marrin vetëm një pikë teksa humbën ndeshjen e parë me Portugalinë ndërsa me Moldavinë u ndalën në barazim 1-1.
Xhuliano Reci ishte shënuesi që kaloi në avantazh Kombëtaren tonë por më vonë do të vinte edhe goli i barazimit. Shanset për kalimin e grupeve janë mëse reale. Në ndeshjen e fundit me Kolumbinë, nesër në orën 09:00, mjafton edhe një barazim dhe do të jenë pjesë e 32 skuadrave më të mira të botës.
Pavarësisht rezultatit, vlen të theksohet një lojë mjaft e bukur nga djemtë tanë, ndryshe nga më përpara. Një grup i ndërtuar me lojtarë që premtojnë sukses për të ardhmen. Mbështetja nga tifozët është e madhe teksa në të dy ndeshjet e para kishte një dyndje kuqezi që pushtuan stadiumin.
