Parku Olimpik është dhënë për "Cinco Cavallin" në datën 31 dhjetor, ku do të ketë këngëtarë që do të bëjnë një koncert për të gjithë ata që duan të jenë prezent. Vendndodhja mes kryeqytetit e bën shtëpinë e sportistëve në vend si pikë strategjike për bizneset. Dhe këtë herë befasia është ulur këmbëkryq në këto festa fundviti. Miliona lekë që do të gjenerohen pikërisht në këtë datë do të mbushin xhepat e biznesnemenëve, ndërsa kosto bie mbi sportistët që të nesërmen mund të shohin një parket të dëmtuar.
Newsport.al u interesua pranë "Cinco Cavalli"-t dhe mësoi se hyrja do të jetë me pagesë. Vetëm të qëndrosh në këmbë pa tryezë përpara, të gjithë të interesuarit do të paguajnë 3000 lekë dhe 5000 lekë, sipas zonës ku ke zgjedhur. Ndërsa në zonat ku ka tryeza çmimet variojnë nga 10000 lekë deri në 150000 lekë duke ofruar edhe një shishe alkooli. Ndërkaq, nëse je afër skenës një tavolina do të kushtojë nga 20000 lekë deri në 30000 lekë. Kurse zona VIP me kolltuqe kap vlerën e 100000 lekëve ku ofrohet një shishe alkooli.
Në një moment kur sporti shqiptar është pushim duke shijuar festat e fundvitit, "pronarët" e Parkut Olimpik nuk hezitojnë ta "pushtojnë" përmes koncerteve të ndryshme. Siç shihet fitimet do të jenë jo të pakta. Vetëm të hysh duhet të paguash. Por natyrshëm lind pyetja: Çfarë do të fitojë një sportist në këto kushte?!
Lexo gjithashtu
