Partizani dhe Tirana janë dy klubet që kanë dalë të humbur pasivisht nga vendimi i CAS. Partizani nuk do të luajë në Champions pas përjashtimit të paralajmëruar të Skënderbeut dhe Tiranës nuk i hapet një vend në Europa League. Por, klubi i kuq e ka parë të arsyeshme të reagojë nëpërmjet rrjetit social “facebook” për këtë fakt, duke e quajtur hidhërim që Shqipëria nuk do të përfaqësohet me asnjë skuadër në Champions League. Ndërsa etiketon FSHF-në si fajtore kryesore dhe pret një qëndrim nga ana e saj për çfarë po ndodh.
“Pas zyrtarizimit të dënimit të KF Skënderbeut, për paracaktim të rezultateve, referuar vendimit të sotëm të CAS, klubi i Partizanit pret një qëndrim nga ana e FSHF-së, duke parë edhe reagimet që kanë mbajtur Federata të tjera demokratike të Europës, në raste të ngjashme. Sot, futbolli shqiptar u njollos zyrtarisht nga organizmat drejtuese të futbollit në kontinent. Ndihemi të hidhëruar që asnjë ekip shqiptar nuk do përfaqësohet në Champions League, për shkaqe anti-futbollistike”, shkruan FK Partizani.
Lexo gjithashtu
