Tirana u eleminua nga turi i parë i Champions League, pasi Dudelange e mposhti në të dyja ndeshjet me rezultatin e përgjithshëm 3-1. Rrugëtimi i bardhebluve do vazhdojë në Conference League, ku përballë do kenë Zrinjski Mostar, kampionë të Bosnjës dhe Hercegovinës.
26- herë kampionët e vendit kanë arsye për t’u hidhëruar më shumë, pasi dje Pyunik Yerevan eleminoi Cluj. Kështu do ishin kampionët e Armenisë që do luanin përballë bardhebluve.
Gjithçka ishte e papritur për Cluj në shtëpinë e tyre gjatë sfidës së kthimit. Kampionët e Rumanisë konsideroheshin shumë herë më favoritë për të kaluar në turin e dytë të Champions.
Ndeshja e parë që u luajt në Armeni përfundoi 0-0, teksa në takimin e kthimit gjithçka u bë dramatike. 90 minutat e kohës së rregullt përfunduan në shifrat e barabarta 1-1, ndërsa shtesat e çuan takimin në 2 me 2.
Ishte ekipi armen që në të dyja rastet baraspeshoi sfidën, fillimisht në minutën e 89’ dhe më pas në atë të 119’. Fati gjatë penalltive i buzëqeshi Pyunik Yerevan, që fitoi 4-3 përmes tyre.
Kampionët e Armenisë do ishin kundërshtari perfekt për Tiranën në turin e dytë të Champions League. Gjithçka ka kaluar tashmë dhe kryeqytetasit kanë filluar punën për turin e dytë të Conference League.
Lexo gjithashtu
