Në panelin e tryezës së rrumbulakët ku u zhvillua sot në mesditë debat-diskutimi i organizuar nga FSHF për nismën "Emancipimi në stadium", drejtoresha e Newsport.al, Anila Basha renditi disa faktorë prej së cilëve rrjedh edhe mungesa e femrave në stadiumet e Shqipërisë, ndërsa hodhi dhe ide sesi mund të prezantohet futbolli dhe dhe sportet në përgjithësi tek të rinjtë dhe sidomos te nxënësit e shkollave 9-vjeçare dhe nëpër gjimnaze.
"Në fakt, ne në Shqipëri e paragjykojmë disi prezencën e femrave në stadium. Por, arritjet e Kombëtares në verën e vitit që lamë pas, duke shkuar deri në Europian, bëri që shumë tifoze emra ta shihnin me më shumë interes futbollin, ta ndiqnin më shumë, madje duke shkuar edhe nëpër stadiumet e Francës.
Ndonjëherë, edhe fakti që kanë ndodhur skandale seksuale siç u akuzua edhe trajneri i Kombëtares së femrave, Altin Rraklli bën që të paragjykohet edhe futbolli, apo edhe lajmet që bëhen mbi dhunën që ndodh në stadiume, e bën këtë të fundit më pak të frekuentuar nga femrat.
Mendoj se duhen promovuar ekipet e futbollit të femrave. Përshembull, unë e ndjek faqen zyrtare të FSHF-së në Facebook, e cila kur futbollistët meshkuj të Kombëtares kanë ditëlindjen, i uron dhe është gjë pozitive. Por nuk kam parë që të bëjë një postim për ndonjë rast të tillë, kur bëhet fjalë për një futbolliste femër të Kombëtares.
Them se ka nevojë për strategji të qartë që femrat të shkojnë në stadium. Ndoshta promovimi i sportit në fakultete dhe në gjimnaze do të ishte një rrugë shumë e frytshme për ta bërë një gjë të tillë. Kjo kërkon edhe bashkëpunim mes Ministrisë së Sporteve dhe FSHF-së, por ekziston mundësi për t'u bërë, sikur edhe përmes broshurave që mund të shpërndahen, në mënyrë që gjimnazistët apo edhe nxënësit e shkollave 9-vjeçare të njihen mbi aktivitetet e futbollit, apo të sportit në përgjithësi.
Mund të bëhet një promovim përmes biletave të stadiumeve. Nuk e di si mund të bëhet një gjë e tillë, sepse përgjegjës janë pjesëtarët e departameneve përkatëse. Mund të jenë edhe politikat qeveritare dhe ajo e FSHF-së për terrenet sportive, apo edhe bazës materiale që mund të shpërndahen nëpër gjimnaze apo edhe 9-vjeçare. Një bluzë me simbolet e FSHF-së dhe të ekipit Kombëtar, do ishte mirë sikur t'i bëhej dhuratë gjimnazistëve. Nuk ka asgjë më të thjesht se kaq për të shtuar disi interesin e tyre.
Tani, është e qartë se femrat i japin bukuri stadiumeve, sepse edhe koret ofenduese do të jenë më të pakta. Por elementi femër i jep mbi të gjitha, qytetari stadiumeve tona. E dimë se edhe infrasktruktura në stadiume nuk është e përshtatshme, sepse nuk është aspak e lehtë për një femër sidomos, që të qëndrojë pa lëvizur tri orë nga shkallët e stadiumit. Gjithsesi, kemi parë kohët e fundit se, në krahasim me të të kaluarën, kushtet në stadiume janë përmirësuar, por sigurisht që FSHF duhet t'iu vendosë kushte klubeve, për standardet e duhura në stadium", tha drejtoresha e Newsport.al, Anila Basha në tryezën e rrumbullakët të diskutimit të organizuar nga FSHF.
Lexo gjithashtu
