Luftëtari arkivoi humbjen e tretë në kampionat, ndërsa tashmë duhet të nisë të mendojë për takimin e radhës që do të luajë në fundjavë kundër Tiranës. Duke parë që stadiumi "Gjirokastra" është drejt përfundimit, por jo i gatshëm që të merret në dorëzim nga FSHF-ja që të luhen takimet e Superiores, edhe këtë javë bluzinjtë duhet që të mendojnë për stadiumin se ku do të luajnë.
Por, fusha e "Adush Muçës" këtë javë është e zënë, kështu që takimi nuk mund të zhvillohet në Ballsh. Gjithashtu dhe "Loni Papuçiu" do të përdoret nga Apolonia vendëse për takimin e radhës.
Mendohet të luhet në Peqin, por fusha është jashtë standardeve, gjithashtu nuk ofron mundësinë që ndeshja të luhet me praninë e tifozëve, çka penalizon këtë takim. I vetmi opsion është Vlora, pasi Flamurtari sërish do të luajë në transfertë. Pritet që ky takim të zhvillohet në këtë fushë, duke parë dhe që ofron dhe sistemin e ndriçimit, ku ndeshja mund të luhet në mbrëmje.
Lexo gjithashtu
