Edi Reja ka folur për ditët që po kalon në karantinë. Trajneri i Kombëtares ka treguar se del shumë rrallë për të bërë pazarin e nevojshëm. Analizoi se si do të ndikonte kjo situatë në futboll si dhe çfarë mund të ndodhë të ardhmen.
74-vjeçari është nga ata persona që mendon për të gjithë, ndaj propozimit të drejtuesve të FSHF-së për të përgjysmuar rrogën, iu përgjigj pozitivisht. Në fund për A2CNN, ka zbuluar bisedat e tij me futbollistët e kombëtares shqiptare.
SITUATA - Situata është ajo që po përjetojnë të gjithë, natyrisht e vështirë. Dal vetëm një apo dy herë në javë për të blerë ushqimet që nevojiten. Fatmirësisht kam shtëpi me kopsht dhe arrij të qëndroj pak më tepër në ajër të pastër. Mendoj për ata persona që jetojnë në apartamente dhe e vuajnë më tepër, por gjithsesi jemi në vështirësi.
FUTBOLLI - Pas një apo një muaji e gjysmë nuk do të jetë e thjeshtë të rigjehet gjendja fizike. Për të rifilluar duhet bërë përgatitja e duhur dhe më pas të mendohet për ndeshjet. Futbolli nuk mund të nisë menjëherë pas një javë, sepse kjo do të përbënte një rrezik të madh për lojtarët, të cilët mund të dëmtohen.
RROGA - Dhurimi i një pjese të pagës ishte një detyrim, sepse ka persona që jetojnë vetëm me futbollin dhe nuk kanë një punë të dytë. U munduam të bënim diçka të vogël në ndihmë të komunitetit. Nuk e kam bërë vetëm unë, por në bashkëpunim me të gjithë stafin tim dhe e kam për kënaqësi. Nëse do të jetë e nevojshme, do të përpiqemi të japim një tjetër ndihmë.
LOJTARËT - Flas shpesh me djemtë e Kombëtares për të mësuar gjendjen e tyre, edhe pse thuajse të gjithë janë në shtëpi, aty ku vijojnë stërviten. Në Itali thuhet se do të nisin përgatitjet rreth datës 20,21 apo 22, për të synuar që rreth muajit maj të jenë gati për të rinisur kampionatin, edhe pse nuk dihet me saktësi kur do të jetë e mundur.
Lexo gjithashtu
