Shumë e mbajnë mend Botërorin 1998 dhe ekipin simpatik të atij kompeticioni, Kroacinë. Kombëtarja ballkanase në atë vit bëri surprizën në Francë ku arriti deri në gjysmëfinale ku u eleminua nga vendasit e Francës me rezultatin 2-1 në një moment kur madje edhe kryesonin 0-1 falë një goli të Suker. Në atë Botëror, Kroacia u rendit e treta duke bërë krenar një komb të tërë.
Një plejadë e shkëlqyer futbollistësh me Tudor, Jarni, Prosinencki, Bilic e shumë të tjerë, por që kulmonin me dy ‘superyjet’ Boban dhe Suker. Por kombëtarja e sotme e Kroacisë që do nisë aventurën e tyre në qershor në Botërorin e Rusisë është ndoshta po aq kualitative.
Kombëtarja e Kroacisë sot ka lojtarë si Lovren, Rakitic, Modric, Kovacic apo edhe Mandiziukic. Lojtarë që luajnë në ekipet më të mira të Botës dhe janë protagonistë. Në brigjet e Dalmacisë ku shtrihet edhe Kroacia e sotme kanë filluar të ëndërrojnë se kjo kombëtare mund të përsërisë atë që bënë Suker me shokë në vitin 1998.
Cilësia nuk mungon, po ashtu dëshira për të bërë mirë. Por shpesh kemi parë se edhe herë të tjera pritshmëritë kanë qenë të mëdha për Kroacinë, por kurrë nuk ia kanë dalë të kenë sukses. Ndoshta pas 20 vitesh mund të jetë edhe rikthimi i madh i Kroacisë.
