Nga Artan Hoxha
Asgjë nuk harrohet...
E njihni këtë tipin? Është zyrtar i Federatës së Futbollit të Kosovës. U bë i famshëm pasi zbatoi një urdhër të presidentit të FFK-së Fadil Vokrri, duke u shfaqur me megafon në dorë para ndeshjes në Turku, Finlande-Kosove.
Ai u bëri thirrje tifozëve shqiptarë, duke u kërkuar të mos mbanin flamuj kuqezi dhe simbole kombëtare me pretendimin se ato i përkasin një vendi të tretë.
Ky tip, ndoshta dhe 3-4 të tjerë përfaqësues të FFK-se, do të shfaqen sërish 2 orë para ndeshjes Kosove-Kroaci në stadiumin "Loro Boriçi" të Shkodrës për t’u kërkuar shqiptarëve të heqin flamujt kuqezi dhe simbolet kombëtare.
Pretendimi është i njëjtë, flamuri i kuq me shqiponjën e zeze dykrenore për të cilin derdhen gjakun per shekuj me radhe heronjtë e Kosovës, nuk i përket Republikës së Kosovës dhe provokon ndjenja shoviniste te pakicat serbe, turke, boshnjake, rome etj.
[caption id="attachment_42114" align="alignleft" width="300"]
Zyrtari i Federatës së Futbollit të Kosovës duke iu bërë thirrje tifozëve shqiptarë nga Kosovë të hiqnin simbolet kuqezi dhe flamurin shqiptar para takimit kundër Finlandës, gati 1 muaj më parë[/caption]
O FFK-ja, Fadil Vokrri dhe gjithë këta “palaçot” me megafon, ndeshja nuk luhet në Beograd, Kragujevaç apo Suboticë, luhet në zemër të Shkodrës.
Nuk ka burrë që ka mbajtur veshur fanellën bardhezi të Partizanit te Beogradit, apo që mban megafon në dorë, t’i detyrojë shqiptarët të flakin simbolet e tyre që i kanë larë me gjak.
Një qëllimi të tillë nuk ia dolën as serbët në mes te Beogradit gjatë ndeshjes Serbi-Shqipëri, duke angazhuar 5000 police e xhandarë, e jo me taborët e mercenarëve të FFK-së.
Kosova edhe pse është një republike më vete, përbëhet në mbi 90% te saj, nga shqiptarë që kanë simbole kombëtare flamurin e kuq me shqiponjë dykrenare.
Shqiptarë, nuk ka rëndësi nga jeni, Shqipëria, Kosova, Presheva, Ulqini, Shkupi, Tetova apo Çamëria, nëse i shihni këta palaço me megafon në dorë, para dyerve të stadiumit "Loro Boriçi" t’u bëjnë thirrje të hiqni simbolet kombëtare,.... e dini vet zgjidhjen....
Gjate ndeshjes se 5 shtatorit Shqipëri-Maqedoni në Shkodër, një nga parullat më të bukura që u përsërit me shpesh ne stadium prej tifozëve kuqezi, ishte ajo:
Kosova, Kosova zemra e Shqipërisë.
Një sugjerim për presidentin e FFK-se: Mos i fry këtij zjarri se do digjesh vet.
Besoj se ke harruar mbrëmjen e vjeshtës së 30 shtatorit 1987, kur në stadiumin "Ushtria Popullore e Jugosllavisë" të Beogradit, ndërsa mbaje veshur uniformen e shkëlqyeshme Adidas me ngjyrat bardhë e zi të Partizanit, ta ulën kokën 11 shqiptarë të Flamurtarit të Vlorës.
Vërtet ata nuk mbanin bluza të shkëlqyeshme të markave prestigjioze në botë, dhe mbase uniformat e trikotuara të kombinatit të tekstileve Berat, linin për të dëshiruar, por kishin ngjyrat kombëtare kuqezi.
Atë mbrëmje bëre gjithçka ta nxirrje fitimtar krenarinë serbe, Partizan i Beogradit. Fitove 11-metershin e golit të parë, shënove golin e dytë duke e festuar me grushtin lart drejt tifozeve GROBARI të Partizanit.
Gati e përmbyse ndeshjen në katër-pesë raste të tjera flagrante, por Anesti Arapi u kthye në një barrikade duke mos ta dhënë mundësinë të shënoje dhe një gol të tretë.
Pastaj, pastaj erdhi Kushta me atë goditje "strahovi udarac" që i bëri të heshtnin 40 mijë serbë në atë stadium dhe te brohorisnin me gjithë shpirt 7 milionë shqiptare të shpërndarë në gjithë Ballkanin.
Ne të njëjtin stadium ku kombëtarja e Shqipërisë u kthye në një tjetër mbrëmje vjeshte 14 tetor 2014, fiks pas 27 vitesh, na rezervuan një pritje më të tmerrshme.
Ende më buçasin në vesh thirrjet shoviniste të mbi 30 mijë serbeve, që kërkonin vdekjen e shqiptareve, ca më tepër të shqiptarëve të Kosovës.
Gjithë Serbia u mobilizua që asnjë flamur kuqezi apo simbol kombëtar të mos futej në stadiumin e Partizanit.
Por nuk i ndaluan dot, as Ismail Qemalin dhe as Isa Boletinin të futeshin ne stadium nga ajri, bashke me flamurin kuqezi.
Ata 11 vlonjatë me bluza tekstili te Beratit, nuk fituan për të të mundur ty, as vetëm për të na gëzuar ne që jetonim ne Republikën e Shqipërisë, por për t’u dhënë krenari gjithë shqiptarëve që qëndronin nën okupimin serb në ish-Jugosllavi.
