Qeveria e Kosovës ka gati plot 200 milionë euro për të investuar në infrastrukturën e futbollit të vendit. Lajmin e ka bërë të ditur vetë kryeministri i Kosovës, Albin Kurti me anë të një postimi në profilin e tij zyrtar, ku tregon se ka filluar puna serioze për të rregulluar stadiumet e vendit.
Kurti thotë se puna po vazhdon në stadiumin “Fadil Vokrri” në Prishtinë, por edhe në Mitrovicë te stadiumi “Adem Jashari”. Gjithashtu, kryeministri i Kosovës tregon se rikontruksione po kryen edhe në fushat stërvitore/ndihmësem si në Bërnicë, Gjilan, Raushiq, Studençan, Komoran dhe Kollkot.
Postimi i Albin Kurtit:
"200 milionë euro për transformim rrënjësor të infrastrukturës së futbollit.
Jemi të vendosur, stadiumet po bëhen. Me këtë vëllim, buxhet e seriozitet nuk është trajtuar asnjëherë futbolli.
Kemi nisur rindërtimin e tërësishëm të fushës së stadiumit "Fadil Vokrri" në Prishtinë. Punimet vazhdojnë në stadiumin olimpik "Adem Jashari" në Mitrovicë. Për përfundimin e punimeve në stadiumin e qytetit të Gjakovës kemi zotuar nëntë milionë euro. Po hartohen projektet për renovimin e stadiumit të Pejës dhe ndërtimin e stadiumit të ri të Ferizajit. Për stadiumin e Gjilanit po zhvillohen procedurat e prokurimit për zbatimin e punimeve, ndërsa shumë shpejt nisim procedurat për fazën e fundit të punimeve në stadiumin "Përparim Thaçi" në Prizren.
Punimet janë duke vazhduar edhe në stadiumet e Malishevës e Shtimes, si dhe në fushat ndihmëse në Bërnicë, Gjilan, Raushiq, Studençan, Komoran dhe Kllokot.
Janë shpallur procedurat për hartim të projekteve për stadiumet e reja të Suharekës dhe Rahovecit.
Pjesë e planit tonë pesë-vjeçar është edhe renovimi i stadiumeve në Vushtrri, Kamenicë, Mitrovicë (Riza Lushta), Podujevë dhe Drenas.
Vlera totale e investimeve tona në infrastrukturën e futbollit është afër 200 milionë euro. Gjatë këtij viti nisim procedurat për stadiumin nacional të Kosovës.
Plani ynë pesë vjeçar për infrastrukturën e futbollit është dakordim mes qeverisë, komunave dhe Federatës së Futbollit. I njëjti i është prezantuar edhe FIFA-s dhe UEFA-së dhe mbështetet nga ta."
Lexo gjithashtu
