Intervista/ Notare e talentuar, zbuloni sekretet e 18-vjeçares që do të përfaqësojë Shqipërinë në Lojërat Olimpike

Nikol Merizaj, vajza 18-vjeçare që do të përfaqësojë Shqipërinë në Lojërat Olimpike, në një prononcim për newsport.al ka rrëfyer se si lindi dëshira për tu marrë me notin, peripecitë dhe sa punë i është dashur të arrijë këtu ku është dhe çfarë mendon ajo për të ardhmen e saj. Gjithashtu Merizaj është shumë e lumtur që në Lojërat Olimpike që do të zhvillohen në Brazil do të përfaqësojë flamurin më të bukur në botë, flamurin kuqezi të Shqipërisë.

– Si lindi dëshira për tu bërë notare?
Dëshira për t’u marrë me sportin e notit ka lindur me mua. E kam dashuruar ujin, mund të them se qëndroja në të me orë e orë të tëra pa u mërzitur.

– Si janë kushtet për stërvitjen tuaj? Pse stërviteni në Greqi, teksa keni deklaruar që Shqipëria ka kushte shumë të mira?
Kushtet janë të mira është e vërtet (flas për infrastrukturën), por nuk është vetëm stërvitja elementi kryesor, ato janë disa që e bëjnë një sportist të kompletuar. Zgjodha të shkoj në Greqi pasi aty është trajneri i cili më ka rritur, qëndruar pranë dhe më ka bërë kjo që jam sot.

– Si ja ke dalë që të arrish këtu ku je sot? Sa kohë të është dashur?
Di të them që më është dashur durim për të arritur rezultatet, por gjithashtu dhe një punë shumë e madhe. Këtë punë në të cilën nuk kam ecur vetëm , kam pasur një mbështetje shumë të madhe nga familja ime dhe një punë të shkëlqyer nga trajnerët e mi.

– Ndihesh e emocionuar për përfaqësimin në lojërat Olimpike?
Absolutisht që ndihem e emocionuar, por mbi të gjitha e vlerësuar për punën që kam bërë.

– Je krenare që do përfaqësosh Shqipërinë?
Jam mëse krenare që përfaqësoj ngjyrat kuq e zi, flamurin më të bukur në botë.

– Çfarë mendon për të ardhmen?
Së pari dua të bëj një performancë të mirë në Lojërat Olimpike. Sa për të ardhmen është familja, gjithashtu dhe trajnerët e mi që kujdesen për mua. Shpresoj të bëhet më e mira.

– Perveç notit, ke pasion tjetër?
Kam shumë pasione , por që koha e reduktuar nuk mi lejon tii ndjek (shkolla-kurset-stërvitja)

– Një premtim për shqiptarët para lojërave Olimpike?
Nuk dua absolutisht të jap një premtim. Gara është garë dhe nuk i dihet çfarë mund të ndodhi, megjithëse ne shpresojmë më të mirën.