Flamur Ruçi ka folur pas fitores 1-0 kundër Laçit. Ishte pikërisht vetë ai që i realizoi kurbinasve në këtë javë të 22-të. Në prononcimin e zakonshëm për Oversport, Ruçi tha:
“Jam shumë i lumtur për golin, por edhe për fitoren. Vinim nga 2 humbje. Ishte një fitore morali për ne. Ishte një kthesë e jona që pritej. Kishim ardhur me mentalitetin për të fituar. Na doli mbarë sot.
Shensoi? Me trajnerin jemi përshtatur shumë mirë që nga dita që ka ardhur. Jemi përshtatur mirë me skemën e tij dhe detyrat që ai do. Besoj se po arrijmë drejt suksesit.
Motivimi? Trajneri Shensoi ka një mentalitet fitues. Ai do të paktën barazimin. Humbjen s’e përmend asnjëherë. Ky është mentaliteti i tij. Siç e patë dhe me Durrësin nuk shkuam për barazim. Sot ishte ndeshje e vështirë. Zoti na ka ndihmuar. Sot ishte një betejë në mesfushë. Siç dihet Laçi ka një 3-she të mirë. Bëmë detyrën dhe i ndalëm. Fituam mesfushëm dhe ndaj morëm 3 pikë. Për ndeshjet e tjera, i kemi të gjitha si finale. Nuk na lejohen më gabime.
Shiriti i kapitenit? Normal se shiriti i kapitenit të bën të mbash përgjegjësi për gjithë ekipin. Gjithashtu ke edhe një besim në vetvete, pasi ekipi të ka përfaqësuar si kapiten”, tha ai.
Lexo gjithashtu
