Pas largimeve të konfirmuara të sulmuesit Dino Spehar dhe mbrojtësit Vangjel Zguro nga Kukësi, te ekipi verilindor një tjetër sinjal paralajmërimi për largim është ndezur së fundmi.
Në një postim të anësorit të djathtë brazilian të Kukësit william Cordeiro Melo në llogarinë e tij në Instagram, ku ka dalë në foto bashkë me shokun e ekipit Reginaldo Faite, lojtari jep mesazhe falenderimi dhe mirënjohjeje ndaj sulmuesit mozambikas për kohën e kaluar te skuadra nënkampione e Shqipërisë. Duke folur në kohën e shkuar, mesazhi i Cordeiros ngre dyshime të forta për një largim të mundshëm të Reginaldos, edhe pse nuk ka asnjë të dhënë paraprake ose lajm zyrtar për mbyllje të kontratës me skuadrën e Armando Cungut.
Sulmuesi mozambikas nuk ka kaluar një periudhë të qetë te Kukësi në këtë pjesë të parë të sezonit duke realizuar më pak gola nga sa parashikohej dhe pritej prej tij, ndaj ekzistojnë dyshimet për një transferim të tij larg skuadrës verilindore gjatë fazës së merkatos së janarit. Pas një nisje të mirë në këtë sezon, Reginaldo u përball me një presion të madh psikologjik për të shënuar sa më shumë, edhe pse ai është i vetmi sulmues i mirëfilltë në radhët e Kukësit.
“Shumë mirënjohës për miqësinë tënde, vëlla! Faleminderit për gjithçka që bëre këtu për mua. Je një mik që do të mbaj me vete gjatë gjithë jetës! Gjithmonë mbështetu te unë!”
Postimi i William Cordeiros
Loading ...
