Lewis Hamilton nuk arriti që të ngjitej në podium në Çmimin e Madh të Bakusë, duke humbur sërish terren me Nico Rosberg. Të dy janë shokë skuadre, ndërsa kampioni i botës në fuqi, anglezi Hamilton, tregon arsyet pse nuk arriti që të ngushtojë diferencën me shokun e tij të skuadrës. “Gara e zhvilluar në Baku ishte zhgënjyese për mua, pasi humba shumë terren ndaj Rosberg. Por tani nuk ka më vlerë të flasim për atë garë, pasi mendoj për sfidën e radhës. Është një pistë e shpejtë, por edhe e vështirë për të parakaluar, ndaj është e rëndësishme të nisesh përpara. Kam nevojë për një tjetër fitore, në mënyrë që të hyj sërish në garë për titullin”, sqaron Hamilton.
Më tej ai flet edhe për shoqërinë me Rosberg, e cila sipas britanikut nuk cënohet nga rezultatet në garë. “Marrëdhënia është shumë e mirë. Nuk e prisja kurrë që do të kishim këto marrëdhënie, por jemi në një moshë që kuptojmë mirë njëri-tjetrin dhe respekti është reciprok. Flasim më shumë mes nesh, diskutojmë dhe besoj se kjo situatë do të jetë gjithnjë mes nesh”.
