Një episod i pashpjegueshëm ka ndodhur dje me tifo-grupin nga Shkupi, "Shvercerat", të cilët ishin nisur nga Maqedonia për të ndjekur takimin e kuqezinjve kundër Izraelit në Elbasan.
Por, policia kufitare e Shqipërisë i bëri bllokadë tifozëve nga Shkupi, duke mos lejuar të kalonin 40 anëtarë të "Shvercerave" nga 100 tifozë që ishin nisur nga Maqedonia.
Ndonëse anëtarët e këtij tifo-grupi kanë kërkuar shpjegim për arsyen e ndalimit të tyre në Qafë Thanë, policia nuk i ka dhënë asnjë sqarim.
Në një intervistë ekskluzive për Newsport.al, kryetari i tifo-grupit "Shvercerat", Omer Bunjaku tregon gjithë ngjarjen e plotë që ka ndodhur në kufirin mes Maqedonisë dhe Shqipërisë dhe sjelljen e policisë me tifozët nga Shkupi.
Ai rrëfen se përgjegjës për këtë situatë është FSHF-ja, duke supozuar se i ndalon "Shvercerat" të ndjekin Kombëtaren për shkak të "binjakëzimit" me tifo-grupin e skuadrës së Tiranës, "Tirona Fanatics".
Sipas Bunjakut, kjo nuk është hera e parë që "Shvercerave" iu ndalohet kalimi në kufirin mes Maqedonisë dhe Shqipërisë, ndërsa tregon se anëtarëve të këtij tifo-grupi nuk iu është dhënë e drejta të blinin bileta për takimin e një viti më parë kundër Serbisë dhe kundër Maqedonisë, zhvilluar në Shkodër një muaj më parë.
[caption id="attachment_54072" align="alignleft" width="300"]
Omer Bunjaku, kryetari i tifo-grupit Shvercerat[/caption]
-Çfarë ndodhi në kufi me grupimin "Shvercerat" të Shkupit?
- U ndaluam së pari në policinë e Maqedonisë që kishte dërguar policia e Shqipërisë për ndalimin e hyrjes sonë në Shqipëri më 12 nëntor 2016 (dje). Na informuan për këtë gjë, por më pas na lejuan të kalonim kufirin maqedonas. Kur mbërritëm në kufirin e Shqipërisë, na ndalën sërish.
-Pse ju ndaluan të mos kalonit në Shqipëri?
-Policia e kufirit u soll shumë mirë. Na thanë: "Nuk kemi çfarë të bëjmë. Kemi urdhër prej lart për ndalimin tuaj". Por në asnjë moment nuk na dhanë një shpjegim të saktë se përse nuk na lejuan të kalonim drejt Shqipërisë.
-Sa orë qëndruat në pritje në Qafë Thanë?
-Rreth 30 minuta.
-Sa prej anëtarëve të grupimit iu ndalua hyrja në Shqipëri?
-Fiks 40 prej nesh u ndalën të mos kalonin kufirin, mes tyre edhe unë vetë.
-A ishit pajisur me bileta për në stadium?
--Po. Kishim bileta. Por nuk i kishim me vete, sepse biletat tona i kishin me vete pjesëtarë të tifo-grupit " Illyrian Elite", të cilët na prisnin në Elbasan.
-Çfarë ju thanë? Si e argumentoi policia ndalimin tuaj?
-Asgjë. Nuk na thanë asgjë! Nuk është hera e parë që na ndodh një gjë e tillë. Edhe në ndeshjen kundër Serbisë, tifo-grupi ynë nuk është lejuar të marrë bileta. Me Maqedoninë gjithashtu nuk na lejuan të merrnim bileta. Nuk e dimë se përse po na bëhet kjo gjë neve. S'kemi përgjigje!
[caption id="attachment_54073" align="alignleft" width="300"]
Omer Bunjaku, kryetari i tifo-grupit Shvercerat[/caption]
-Sa persona ishit nisur nga Shkupi?
-Diku te 100 tifozë.
-Pse gjithë këto probleme për shqiptarët që vijnë nga Maqedonia?
-Kjo është pyetje që e bëjmë edhe ne.
-A do të vini sërish për të parë Kombëtaren kuqezi në Shqipëri?
- Sigurisht që do bëjmë çmos të jemi afër Kombëtares sonë sërish.
- Ndonjë reagim do keni ose të paktën do kërkoni të flisni me ndokënd nga FSHF për këtë problem?
- Presim vetëm një përgjigje nga FSHF, për pyetjen: pse nuk po na lejojnë neve si grup të hyjmë në Shqipëri dhe të shohim ndeshjet e Kombëtares? FSHF është përgjegjëse për këtë situatë.
-Përse mendoni se është FSHF përgjegjëse për këtë çështje?
- Nuk e di me saktësi, por ndoshta për faktin se ne si tifo-grup jemi të vëllazëruar me "Tirona Fanatics", të cilëve po i bëjnë të njëjtën gjë si edhe neve. Kështu supozojmë.
NEWSPORT.AL/ Andi TANKU
[caption id="attachment_54070" align="alignnone" width="800"]
Faksimile nga vendimi i refuzimit per hyrjen ne Shqiperi te anetareve te grupimit "Shvercerat" e Shkupit[/caption]
[caption id="attachment_54074" align="alignnone" width="960"]
Shvercerat, dje pas ndalimit te hyrjes per ne Shqiperi, ne kufirin Qafe Thane[/caption]
Lexo gjithashtu
