Ilir Daja ka folur pas barazimit 1-1 me Kamzën. Trajneri i Skënderbeut deklaroi:
"Do të thoja që na vjen keq që morëm gol në atë formë, por sigurisht këto janë pjesë të lojës. Duhet të marrim gjithmonë 3 pikëshin si në fushën tonë, ashtu edhe në transferta. Ky është problemi i vetëm. Kishim dy mangësi, jo për justifikim si Jashanica dhe Lilaj.
E kemi mbajtur për gjatë gjithë lojës kundërshtarin në gjysmë fushën e vet. Kemi pasur raste, situata para porte, volum, por futbolli i ka të gjitha këto. Problemi është që ajo lloj situate duhet të ishte vlerësuar ndryshe nga mbrojtja jonë pasi ishte një top nga gjysma fusha e kundërshtarit. Duhej të ruhej vetëm distanca e sigurisë. Duhet të administronim avantazhin. Aty çeduam. Jo vëmendja e duhur solli edhe atë gol që solli barazimin e ndeshjes.
Klasifikimi na jep komoditet, pavarësisht se në fushën tonë ose të tjera nuk arritëm të tregonim ata që të gjithë presin. Nuk është fundi i botës që sot morëm një barazim. Pothuajse në pjesën më të madhe të ndeshjes kemi qenë në territorin e kundërshtarit. Mos të harrojmë edhe faktin që edhe Kamza është një skuadër që ndodhet në vendin e katërt të klasifikimit. Një rezultat pozitiv do të na jepte më shumë qetësi. Jemi skuadra që kontrollojmë lojën me të gjithë ekipet e Superiores.
Unë nuk them që nuk kam lojtar me kualitete, por lojtarët që futen nga pankina duhet të kenë cilësitë për t'u përshtatur me grupin. Unë nuk jam trajner që merrem me ekipin e Kamzës ose të tjerëve. Çdo lojtar që kërkon fanelën e titullarit, le ta fitojë. Nuk ia japim ne nga pankina", deklaroi ai.
Lexo gjithashtu
