Barcelona kaloi me sukses Atletico Madrid, me katalanasit që sigurojnë finalen. Skuadra e Hansi Flick fitoi 1-0 gjysmëfinalen e dytë, duke u kualifikuar në finale të Kupës së Mbretit me rezultat të përgjithshëm 5-4.
Pas këtij suksesi ka folur trajneri gjerman. Ky i fundit ka theksuar se skuadra e tij e meritoi dhe se e kërkoi me çdo kusht finalen. Siç dihet në finale do të sfidojnë Real Madrid dhe për Flick do të jetë një ndeshje shumë e luftuar dhe emocionuese, ku spektakli nuk do të mungojë.
“Të vish e të fitosh në Madrid kundër Atleticos është shumë e vështirë. Por në fund mendoj se e kemi merituar për çfarë kemi bërë në fushë. Në pjesën e parë kemi dominuar dhe mund ta kishim mbyllur takimin. Nuk ia dolëm, ndaj na u desh të vuanim disi në të dytën.
E prisnim që Atletico të shtynte përpara. Megjithatë, e kemi administruar mirë. E dëshironim me çdo kusht finalen dhe dua të përgëzoj lojtarët për punën e bërë. Jam shumë i kënaqur. Kundër Realit do të jetë një ndeshje e madhe. Është e mrekullueshme të luash një El Clasico, por ka shumë ndeshje përpara. Ka shumë gjëra të rëndësishme. Tani për tani, finalja nuk është prioritet.
Tripleta? Na lejohet të ëndërrojmë, por duhet të jemi të përqendruar dhe të fokusohemi te qëllimet tona. Do të mbërrijmë në tre ose katër të mëngjesit, pastaj duhet të flemë, të rikuperohemi dhe të kthehemi në stërvitje. Na pret ndeshja kundër Betis. Javët e ardhshme nuk do të jenë të lehta, por kemi një ekip fantastik. Klubi dhe tifozët mund të jenë krenarë për këtë skuadër”, ka deklaruar gjermani.
Lexo gjithashtu
