Disa orë para ndeshjes PSG-Barcelona ka folur presidenti katalanas, Joan Laporta. Ky i fundit foli shkurt për gazetën “Sport”, por dha disa deklarata mjaft interesante. Laporta shprehet se të gjithë janë optimist dhe të motivuar, teksa thekson se nuk do të ndryshonte asnjë lojtar të tijin për një të Paris Saint-Germain.
“Unë jam gati, plotësisht i përgatitur për këtë ndeshje. Unë i shoh lojtarët shumë të motivuar dhe kjo më jep besim. Mesazhi për tifozët tanë është të besojnë te lojtarët dhe trajneri. Ne kemi një ekip të madh. Jemi shumë të fokusuar dhe është e rëndësishme që ata të dinë se unë nuk do të ndryshoja asnjë nga lojtarët e mi për një të PSG-së”, është shprehur Laporta.
Kujtojmë që Barcelona do të luajë mbrëmjen e sotme në transfertë përballë Paris Saint-Germain, sfidën e parë të vlefshme për çerekfinalet e Uefa Champions League. Ndeshja që do të zhvillohet në stadiumin “Parc des Princes”, do të startojë në orën 21:00.
