Carlo Ancelotti ka folur në prag të finales së Champions League. Real Madrid dhe Dortmund masin forcat më 1 qershor, prej orës 21:00 për trofeun më prestigjoz europian.
Strategu i madrilenëve nuk e ka fshehur se frika është e pranishme. Ndër të tjera Ancelotti zbulon se në portë do e nisë Courtois.
Kush do të luajë në portë?
"Lunin kishte grip. Nesër ai do të vijë me ne dhe do të jetë në stol, kështu që Courtois do të luajë."
Çfarë ndikimi ka tek ju të jeni sërish në finale?
"Jam shumë i lumtur që jam këtu. Shqetësimet do të vijnë më vonë. Unë kam shumë besim në ekipin tim. E di që lojtarët e mi do të japin gjithçka, madje edhe Rodrygo. Ai është një lojtar shumë i rëndësishëm dhe do të jetë i tillë në edhe e ardhmja, pa dyshim”.
Si po e përgatisni këtë takim?
"Gjëja më e rëndësishme në këtë lloj ndeshjeje është t'u jepni lojtarëve ide të qarta se çfarë duhet të bëjnë në fushë. Do të fokusohem në aspektin taktik të ndeshjes. Të gjithë i trajtojnë emocionet ndryshe. Frika dhe shqetësimi janë një pjesë e rëndësishme. Skuadra ka treguar cilësi dhe sakrificë, ky do të jetë çelësi nesër.
Si është të dalësh në fushë në Wembley?
“Të luash këtu, në këtë stadium historik është emocionuese”.
A është Real Madridi i fiksuar pas Champions League ?
"Liga e Kampionëve nuk është një obsesion. Obsesioni është të konkurrosh dhe të japësh më të mirën. Ka momente kur gjërat nuk shkojnë ashtu siç do të donit. Tashmë mund të themi se sezoni ka qenë shumë pozitiv."
Jeni pak i frikësuar apo i shqetësuar për të nesërmen?
"Një finale e Ligës së Kampionëve është ndeshja më e rëndësishme. Ne duhet të shfrytëzojmë maksimalisht të qenit këtu dhe më pas do të vijnë shqetësimet. Frika mund të jetë atje. Është një finale e Champions League. Është një ndjenjë që të gjithë e kanë. Është normale, por ju jeni më të lumtur nëse fitoni dhe kapërceni frikën."
