Rizespor do të përballet këtë të diel në shtëpi me Galatasaray, në ndeshjen e vlefshme për javën e 21-të të Superligës turke. Në prag të këtij dueli ka folur edhe mesfushori shqiptar i Rizespor, Qazim Laçi. Kujtojmë se 19 paraqitje deri tani, dibrani ka shënuar 3 gola e ka asistuar në 4 të tjerë.
“Sigurisht që kjo nuk është një situatë me të cilën jemi të kënaqur. Në dy ndeshje kemi humbur pikë. Po e analizojmë vazhdimisht se ku kemi mangësi. Do të punojmë për këtë. Ende asgjë nuk ka përfunduar. Ka edhe ndeshje që ekipet e tjera do t’i luajnë mes tyre. Do t’i ndjekim edhe ato. Edhe ne kemi një ndeshje kundër Besiktas. Në atë ndeshje do të përpiqemi të japim më të mirën tonë.
Sinqerisht, nuk e vlerësoj performancën time personale. Më shumë e vlerësoj kontributin që i jap ekipit. Kur një ekip luan mirë dhe ecën mirë, atëherë edhe unë, si pjesë e atij ekipi, vlerësohem pozitivisht. Në këtë kuptim, i kushtoj më shumë rëndësi asaj që i jap ekipit. Përpiqem që të jetë në të mirën e skuadrës sime. Kur e shikon, në shumë ndeshje kemi zhvilluar lojëra shumë të mira. Kemi krijuar raste. Ka pasur ndeshje ku kemi shënuar gola, por nuk kemi arritur të fitojmë. Mendoj se kemi pasur pak fat të keq. Ndoshta ka raste kur duhet të jemi më të kujdesshëm edhe në aspektin mbrojtës.
Galatasaray? E dimë që do të luajmë kundër liderit të kampionatit, një skuadre shumë të fortë. Jemi të vetëdijshëm për vështirësinë e kësaj ndeshjeje. Por do të luajmë në shtëpinë tonë. Për ne, nëse arrijmë ta mbajmë rezultatin në zero duke mos pësuar gol, mendoj se do të kemi mundësi për të shënuar. Në këtë drejtim do të përgatitemi. Duke qenë se do të përballemi me një kundërshtar të vështirë, do të jetë një ndeshje e fortë, ndaj që nga sot do të përpiqemi të përgatitemi sa më mirë. Kjo është shtëpia jonë. Do të luajmë në fushën tonë. E dimë që do të luajmë kundër Galatasaray dhe e dimë që do të jetë një ndeshje e vështirë. Por përpara tifozëve tanë shpresojmë të bëjmë më shumë dhe të marrim një rezultat të mirë.
Kur shikojmë tabelën e renditjes, mendoj se nuk jemi në një pozicion që na kënaq. E shoh kështu sepse mendoj se meritojmë vende shumë më të mira. Si në ndeshjet që luajmë në shtëpi, ashtu edhe në transfertë, situata është e njëjtë. Krijojmë shumë raste, prodhojmë pozicione dhe luajmë një futboll kreativ. Në disa ndeshje shënojmë dhe kalojmë në avantazh. Por nga ana tjetër duhet të jemi po aq të kujdesshëm në mbrojtje. Duhet të pengojmë kundërshtarët të shënojnë. Kur arrijmë ta mbajmë mbrojtjen në zero, kur nuk pësojmë gol, mendoj se përpara do të krijojmë raste me kreativitetin tonë dhe do të shënojmë. Kështu e shohim edhe ndeshjen kundër Galatasaray”, tha Laçi.
Lexo gjithashtu
